Khot iakren u DC ia ka KSU

Tang hadien shi sngi ba ki nongialam ka Khasi Student’s Union North Khasi Hills District ki la khang ia ka jingpyntrei ban tei ia ka dukan ha ka jaka ba la pynieng ia ka felicitation centre ba dei ka khyrdop ban peit ia ka jingwan rung ki mynder, u Deputy Commissioner ka Ri Bhoi District u Abhishek Saini ula khot ia ki nongialam mynta ka sngi mynta ka sngi bad kyrpad ban ai lad ban pyndep ia katei ka jingtrei hynrei ki nongialam ka seng ki la ieng skhem ban pyrshah ia ka jingtei ia ka food court.

Ki nongialam ka KSU, North Khasi Hills District ha ka 30 tarik Jylliew ki la leit ban pynsangeh ka jingtrei ban tei food court ne jaka bam ha ka jaka ban pyntreikam ia ka felicitation centre ban pyrkhing ia ka rung ka mih ki bar jylla bad mynder ri hadien ba ka sorkar ka la khang khyrdep ia katei ka khyrdop.

Na ka liang ki bor pyniaid district ha ka 2 tarik Jymmang lyngba u Abhishek Saini, Deputy Commissioner ha ka jingiadonlang bad u Superintendent of Police u Giri Prasad lem bad u Tourism Department office u Bah Banshynshar Nongkynrieh ki la khot ban ia kren pynbeit halor katei ka kam ia ki nongialam ka KSU ba la lamkhmat da u Bah Ferdynald Kharkamni kum u President lem bad u Samla James Hitler Mawphniang bad kiwei kiwei ki dkhot.

Haba kren bad ki Nongthoh Khubor, u Bah Ferdynald Kharkamni, u la iathuh, ba ki bor district ka Ri Bhoi District ki la khot ban ia kren halor ka jingkhang jong ka seng ia ka jingpyntreikam ia ka jingtei ia ka jaka bam ha Umling kaba dei ka jaka kaba la mang ban pyntreikam ia ka felicitation centre kaban pyrkhing ia ka jingrung ki bar jylla bad ki mynder ri sha kane ka jylla Meghalaya.

U la iathuh ruh, ba ha ka jingiakren na ka liang ka seng ka la pynpaw ban ieng beit ha ka nongrim ba katei ka felicitation centre ka dei ban treikam noh mardor kumba la mang naduh u snem 2020 ia kaba la plie ruh da u Myntri ka Sorkar Jylla, bad ba ka sorkar jylla ka dei ban pyntreikam ia ka mardor na bynta ka jingshngain jong ka jylla.

U Bah Kharkamni u la bynrap ruh, ba ki bor district ki la pynwandur ba ka jingdon jong kane ka jaka bam ha katei ka jaka kan aikam aijam ia ki samla, hynrei na ka liang ka seng ka la pynkynmaw ba ha ka por ba pyntreikam ia ka felicitation centre ki la don kumba 32 ngut ki Data Entry Operators kiba treikam hynrei mynta kine ki jah shaei, nalor kiwei kiwei ki jait kam ba la trei da ki samla, kumta ka seng ka la dawa ba ka sorkar kan pyntreikam ia kane ka felicitation centre nalor ka jingpeit pyrman ia ka jingrung ki mynder bad bar jylla kan long ruh ka lad ban aikam aijam ia ki khun samla.