Ka kyrdan pule puthi ba ai ka PGI ha Meghalaya ka bakla

Ka long kaba donkam ban pynbiang ki jingdonkam bad ki lad ai jingtip ha ki skul ban kyntiew ia ka Performance Grading Index (PGI) ha ka pule puthi ka jylla Meghalaya, la ong u Conrad K Sangma Myntri Rangbah ka Jylla. Ia kine ki kyntien ula kren ha ka jingialang buh mawnongrim ia ka Sohkha Government Higher Secondary School bad pynkup burom ia ki khynnah skul ba pass bha ha ki eksam bapher. U la bynrap ki jingduna ban ai jingtip ia ki jingkhein ka lam sha ka jingduhnong ba khraw ha ka PGI. “Sngewsih, ka kyrdan ba paw ha ka PGI kam dei hok ia ka pule puthi ka Meghalaya. Kane ka mat kam dei tang halor ka jingleh bha, hynrei kumno ngi ai jingtip ia ki” ula ong bad ki dak ki kdew ia ka jinglah treikam, kum ka jingdon ki jaka pule kot lane ki prokram pynshai kum ka Cyber Safety ne jingshngain ka Cyber, ki bym shym la ai jingtip da ki skul ka wanrah ka jingduhnong ha ka jingioh mark.

“Ha kiba bun ki khep, ki jingpyrshang kiba rit kum ka jingpynlong ia ki prokram ai jingpynsngewthuh ba shisngi lane ai jingtip ha ka rukom kaba dei ia ki jingdon ki kor ki bor ki lah ban pynioh ia ngi ia ki ‘Point’ kiba donkam. Ngi la duh jan 100 marks namar ka jingduna ha ka jingiapei bha ban iakren bad ban ai jingtip” ong u Myntri Rangbah bad ka shim ia kane kum ka lad pynbeit kiba suk, ula kyntu ia ki Khlieh pyniaid jong ki skul bad ka Tnad Pule Puthi ban pynleit jingmut ha ka jingai jingtip kaba beit bad ha ka por kaba biang namar ba kine kidei ki kam kiba suk, hynrei ki donkam ia ka jingshimkhia bad lada pynkhlain ia ka rukom ai jingtip, ka kyrdan PGI jongka jylla kan sa kiew.

U Myntri Rangbah ula kular ba ka sorkar kan iai bteng ban ai jingkyrshan ban pynkhlain ia ki jingtei jong ka skul, pynbha ia ki lad pyniasoh bad pyniar ia ki lad ki lynti ha ka kam pule puthi ha kylleng ka Jylla. Ha kane ka jingialang la iadonlang u Myntri ka Tnad Pule Puthi u Bah Lahkmen Rymbui bad u Myntri ka Tnad Ialehkai u Bah Wailadmiki Shylla bad la pynlong ia kane ka jingialang kum ka dak jong ka jingplie ia ka Children and Adolescent Library bad ki kor digital ha shnong Sohkha Mission.