U Commissioner & Secretary ka tnad Bording u Sanjay Goyal ula ong, ka don ka jingduna pynmih bording ilektrik ka Meghalaya Energy Corporation Limited (MeECL) na ka jingduna hab slap ha u bnai Jylliew, hynrei ula pynthikna ka jingsam bording kan biang ha jylla baroh kawei. U Sanjay Goyal ula ong, ba u bnai Jylliew bun sien u dei u bnai ba jur slap, hynrei mynta u snem la sakhi duna bha u slap bad ia katei lah dep ban pynskhem da ka IMD, hynrei ka tnad ka lah shimkhia ban pynbiang ia katei ka jingduna bad ula pynthikna ka jingsam bording ha kylleng ka jylla kan biang ha baroh u Naitung bad Nailar watla ka jingpynmih bording ka duna.
Ula ong, ka jingtlot ha ka jingioh bha ia u slap kala ktah ia ka pung Umiam kaba dei kaba lam ia ka jingpynmih bun ia ka bording ha ka jylla bad kaei kaei kaba ki thmu ha u bnai Jylliew, ban ioh bha ia u slap, kam shim la treikam satia. Kumta ka tnad kala hap ban pynkhreh biang ia ka rukom treikam ka jong ka. Ula ia thuh ba ka Umiam Stage I, kaba ju treikam pura ban pynmih 36 Megawatt hynrei ha une u snem ka jingpynmih ka jongka kala long hapoh jong katei ka jinglah ban pynmih bad kala don ka jingpynmih duna ia ka bording naduh ka Umiam Stage I haduh ka Stage IV bad ruh ka Umtru kaba thymmai kaba don sharum.
U Goyal ula ong, “Ka jinglong jingman ka dang biang namar ba ngi lah dep ban iateh lypa na ka bynta u Naitung bad Nailar da kaba pyniaid ia ka jingpynmih ia ka bording bad ban pyniaid ia ka jingthied ia ka bording na shabar ka jylla lyngba ki tnad bapher bapher. Ngam iohi ban don kano kano ka jingduna ha kaba iadei bad ka jingsngewkhia ia ka jingdon ia ka bording”.