U Symbud Myntri sorkar u Bah Sniawbhalang Dhar ula iakynduh ia ki dkhot ka Election Committee u MLA ka 4 Mowkaiaw Constituency u bah Nujorki Sungoh ha ka sien banyngkong naduh ba ula iasoh sha ka NPP na ka seng riewlum ka UDP.U symbud myntri, uba dei ruh u National Vice President ka NPP ula iakynduh ia ki ha ka 16 tarik mynta u bnai ha ka jingialang ha dorbar hall ka shnong Mukhap, hynrei u bah Sungoh um shym la lah ban ia don ryngkat namar ba u don hapdeng ka met ka bym koit bym khiah.
Ha ka jingialang ba pyniaid da u Laiwan Lamare la pdiang bad pynkup burom ia u Sñiawbhalang Dhar da ka dorbar shnong Mukhap, da ki longkmie ka shnong Mukhap, da ka Committee Election u Nujorki Sungoh kumjuh ruh u Eleazer C Dkhar uba juh bat kum u President UDP mynshwa ha ka 4 Mowkaiaw.
U Eleazer C Dkhar haba kren ula ong, kum ki nongialam ka UDP ha ki por ba la dep, ki angnud ban leh kaba bha tam na bynta ki paidbah, hynrei ym lah namar bym don ha ka bor ne ha ka sorkar, kumta haba iohi ba kane ka sorkar ha ka jinglamkhmat ka NPP ka la long shisha kaba wanrah bun ka roi ka par ha ki liang baroh kumta ma ki ruh kum ki nongkyrshan bad rai ban rung sha ka NPP ryngkat bad u MLA.
“U MLA kum u kpa uba la wad ki lad ki lynti kumno ban pyndap pynbiang iaki khun ki kti haka constituency, u rung shaka NPP ruh dei na ka daw ba u don ka jingsngewkhia ia u paidbah” ong u EC Dkhar.
U ong ruh ba kiba pyrshah ki lah ban kren bun jait hynrei u MLA u don ka jingpyrkhat jngai kumno ban wanrah ia ki kam pynroi bad ban pynjem iaki jingeh u paidbah.
Na ka liang u Sñiawbhalang Dhar pat haba kren u iaroh ia ka jinglong u MLA Nujorki Sungoh nalor ba u long u briew ba jai jai bad ba sngewrit, u don ruh ka jingiohi jngai na ka bynta ki paidbah ka Constituency.
Haba ai jingiaroh ia ki paidbah ka Mowkaiaw Constituency u sngewkmen ruh ban iohi ba kiba juh kyrshan UDP bad kiba la don lypa ha ka NPP mynta ki la iatreilang ryngkat ryngkat ban nangkhlaiñ bor shuh shuh ka NPP, bad ka jingwan jong u ha kane ka sngi ruh u ong dei da ka mynsiem ba sngewkhia bad sngew ieid ia baroh kiba rung sha ka NPP.
U kyntu ruh ia ki paidbah ba kim dei ban buh nud lada jia don kano kano ka jingbakla namar kum ki briew ym lah lait.
“Haba jied ia ki nongmihkhmat dei ban peit da kiba don jingkitkhlieh ym ki ban ong ieid jaitbynriew tang ka ktien bad u Nujorki Sungoh ruh dei uta uba don ka jingkitkhlieh”.
Shuh shuh u Sñiawbhalang Dhar u ong, kane ka sorkar kam dei kaba ñiew shiliang da ka jingiatreilang ki MLA wat lada ym dei na kajuh ka party ruh ki pynpoi beit ia ka roi ka par, da kaba u ai nuksa ia kane ka Constituency.
U iathuh ruh ha ka jingshong iathuh khana jong u bad u Nujorki Sungoh ula ong, ia u Nujorki ba ha u 2027 lada rung ne ym rung NPP ki paid ka thaiñ jong u ruh un sa pynioh Civil Sub Division ia ka Thadlaskeiñ C&RD Block.
“Haba nga long u Dy.CM ngam kwah ban kiew tang ka Constituency lajong hynrei kiwei ki constituency ka Rilum Jaiñtia ruh kin kiew lang” ong u S.Dhar.
Nalor ba u pynkynmaw ia ki kam pynroi ka sorkar ha kane ka thaiñ u ong ruh ba dang bun kiwei pat ki skhim ki project ban dang wan.
U khmih lynti ruh lyngba ka jingiatreilang ki paid kane ka thaiñ naduh ka By election MP ban wan yn dang ioh myntoi shuh shuh kane ka constituency arshah na kaba juh ioh.
Ha kane ka sngi la ioh ruh ka jingkren na u Rio Sten Ex MDC JHADC, na u Onyx Suchiang, ka jingduwai na u Tbn Kamdathmu Suchiang shwa ban sdang ka jingialang.
You may also like
-
Ka buit thymmai ban pynkylla sboh ia ki niut bad ki mar pyiut lyngba ki wieh
-
Ka jingkren u Dy CM ia ki nonghikai ka long tohmet u dei ban pan mab: Dr Mukul
-
Khynra ka ANTF ha Lumsurvey, kurup drok ba T.75 lak
-
Kynduh ka ka FKJGP ïa u SDO ba sniew palat ka surok Baridua-Killing
-
Ka AI Job Fair ka thong ban wanrah jingkylla ia ka Meghalaya sha ka ‘AI Valley’
