Ka buit thymmai ban pynkylla sboh ia ki niut bad ki mar pyiut lyngba ki wieh

Ka kynhun Nongthoh Khubor na Shillong ha ka jingleit jngoh dang shen ia ka jaka rep ka Sengkey Ch Sangma 36 snem ha shnong Dabram, Banghmara C&RD Block, South Garo Hills kaba pynmih sboh (vermicompost) da ki wieh lyngba ka jingkyrshan ka tnad ka rep bad ka ATMA C&RD Block.

Ka la sdang ia ka kam pynmih sboh ha u snem 2025 da ka jingiarap pisa ka tnad Agriculture T.25,000 ban pynshlur ia ki nongrep ban shim ki buit thymmai ban pynmih sboh (vermicompost) katkum ka juk stad, hadien ba la ai jinghikai kynthup ban jied ia ki wieh ba biang, ka jaka ban buh wieh bad kiwei ki mar ba pyiut ban pynmih sboh.

La iathuh ki mar ban pynmih sboh ha ka thain ki long ka eit masi, ki sla kait ba im bad tyrkhong bad kiwei ki mar ba pyiut. Kane ka long ka buit ia ki nongrep ban pynkylla sboh ia ki jaboh jabaiñ ban myntoi ha ka kam rep bad ka lad ban ioh kamai.

Ka Sengkey ka shna iing ba ar kamra ban pynmih sboh da ka jingiarap ka tnad Agriculture ha u snem, 2025 bad ka pyndonkam ki mar rep ba pyiut, ki sboh jingri ban pynmih sboh or organic bad lyngba ka jingtrei shitom ban pynbiang ki jingdonkam ka lah ban pynmih sboh palat 150 kilo.

Kumba long mynta ka kamai T.63 hajar shisnem na kaba die sboh, nalor ba die ia uwei u wieh T.4 tyngka sha kiwei ki nongrep ba kwah ban pynmih sboh. La iathuh ka dor jong ka sboh mynta ka long T.50 shi kilo bad ha ka shisnem ka lah ban pynmih kumba 1200 kilo bad ka don jingthmu ban pyniar shuh shuh ia ka kam ha ki snem ban wan.

Kumjuh ka Sengkey nalor ba die ka sboh ka ioh ruh ban pyndonkam ia lade ban rep bad thung jingthung ban lait ka jinglut phut, namar kane ka sboh ka iarap shibun ia ki jingthung ban seisoh.

Ka District Agriculture Officer, South Garo Hills ka Mayline T. Sangma ka iathuh ka jingdawa sboh (vermicompost) mynta ka jur bha na ki nongrep ha ka thain, hynrei ki shem jingeh ban pynbiang ia ki jingdonkam ba dang duna ka jingpynmih. Kane ka pynpaw ba ka iew ka kiew bad ka pynshlur ia ki nongrep ban shim kane ka kabu ban pynmih sboh khlem dawai lyngba ki wieh ban ban iarap ia ka koit ka khiah.

Ka iathuh haduh mynta ki don 14 unit jong ka vermicompost hapoh ka Organic Scheme ha South Garo Hills, kynthup 4 unit ha Baghmara Block bad iwei na Rongara C&RD Block ba la pyntrei ha u snem, 2024-25, katba 5 Unit ha Baghmara C&RD Block, 2 Unit ha Rongara C&RD Block bad mar shi Unit ha Chokpot bad Gasuapara C&RD Block la pyntrei ha u snem 2025-2026. Ka ADO ka kyrmen kine unit kin ai jingmyntoi ia ki paidbah nongrep kiba kwah ban kyntiew bad pyniar ia ka kam rep.

Leave a Reply

Your email address will not be published. Required fields are marked *