Iasnohkti lang ki paidbah ban pynkhuid ia ki Iew bad ki shnong ha Jowai

Kum shibynta ka khuid ka suba ne Swachhata Hi Seva halor ka phang “Swachhata Mein Sahbhag, Swachh Bharat, Visit Bharat” kaba mut ba ka jingkhuid kam shong tang haka kamram ka sorkar hynrei ka dei ka kamram uwei pa uwei u nongshong shnong ki paidbah, mynta ka sngi kaba dei ruh ka sngi kha u Mahatma Gandhi, ki nongshong ka Jowai kila iasnohkti lang ban pynkhuid ia ki shnong ki thaw bad ki jaka paidbah

ha sor Jowai, da kaba ia mih ryntih ban pynkhuid ia la ki jong ki shnong ki thaw, ki iew ki hat ba kynthup ka iawthymme, iawchyiap, iawchor, iaw Seiñraij bad kiwei de.

Ia ka jingpynkhuid ha ki iew ha Jowai la iatreilang da ka Municipal Board, ka Dorbar shnong Tympang Iawmusiang, bad ki komiti pyniaid iew bapher bapher.

Shwa ban sdang iaka jingpynkhuid la don ka jingialang ban pynsngewthuh ia ka khuid ka suba, ha kaba la iadonlang ki Waheh shnong bapher bapher ka Jowai, ki Scouts and Guides, ki nongdie madan ha iew, bad ki paidbah nongshong shnong.

Haba kyntu ia ki paidbah ban iatylli lang halor ka khuid ka suba ka kong D. V. Lyngdoh, Additional Deputy Commissioner kaba dei ruh ka CEO Jowai Municipal Board, kala pynpaw ia ki nongrim bad ka jingdonkam jong ka Swachhata Hi Seva, bad kala pynsngew iaka jingdonkam ban pynneh iaka jingkhuid haki jaka paidbah.

Ka ong ruh ba naduh ka 17 tarik u bnai September haduh ka 17 tarik u bnai October, 2026, kin kham phaikhmat shaki jaka iew, ki jaka jngohkai pyrthei, bad kiwei de ki jaka paidbah.

Shuh shuh, kala kren halor ki Solid Waste Management Rules 2026, da ka ban pyniapher ban bhah ne kyntait iaki ñiut naduh na iing (segregating waste at source) shwa ban bret iaki ha ki borti bapher bapher.

Ka la pyntip ruh ba ka Jowai Municipal Board kala dep jied iaki jaka na ka bynta ban pynlong ia ka jingpynkhuid kum shi bynta ban pynsngewthuh iaki paidbah nongshong shnong halor ka khuid ka suba.

Nangne shakhmat, yn sa don shuh shuh ki jingpynkhuid bad ki prokram ban pynsngewthuh halor kumno ban pyniakhlad ia ki niut bad ban pynneh iaka khuid ka suba.

U P. Lyngdoh, Chairman ka Jowai Municipal Board, ula lamkhmat halor ka kot lyngkdop kular ban pynneh ryntih iaka jingkhuid ha ki iew bad ki jaka ba marjan jong ka Jowai. Katba u Doloi ka Elaka Jowai, u Puramon Kynjing, ula ban jur halor ka jingdonkam bakhraw ban pynneh ia ka jingkhuid bad ka rukom im ba don jingkitkhlieh haka imlang sahlang.