Kynduh ki nongialam KSU ia ki nonghikai KJDSTA ban ai jingkyrshan ia ki jingiakhih

Ka Khasi Students’ Union (KSU) Central Executive Council hynne ka sngi ka la leit ban ïakynduh ïa ki nonghikai jong ka Khasi Jaiñtia Deficit School Teachers Association (KJDSTA) ha madan Pohkseh kiba dang don hapdeng ha jingïakhih ban dawa ïa ka hok ka jong ki.

Ka jingïakynduh jong ka Seng ïa kine ki nonghikai ka long ban ai ka jingkyrshan kaba pura ha ki mat jingdawa ka jong ki.

Ka Seng ka la pynpaw ka jingbitar ia ka jingsngap mynthi ka Sorkar bad ban thok ban shukor ïa ki la bun bunsien ha ki mat jingdawa ka jong ki. “Kane ka jingleh mynthi ka sorkar ka pyllong ia ki nonghikai na kapor sha ka por ki hap ban mih madan ban dawa ïa ka hok ka jong ki. Ha ka jingshisha ka jaka jong ki nonghikai ka dei hapoh kamra klas ym ha madan hynrei ka jingshukor ka Sorkar bad ki polisi kaba ka wanrah ka bym tei ïa ka bha ka miat jong ki, ka pynlong ïa ki ban mih madan,” ong u General Secretary ka KSU u samla Reuben Naijar.

Ula ong ba ka jinghiar ka pule puthi ha ka jylla ka dei namar ka Sorkar kam sngap ïa ka jing pynsngew jong ki nonghikai hynrei ka leh katba ka mon tang ban pynbiang ïa ka pla tyngka jong la jong khlem da pyrkhat ïa ka lawei jong ki samla pule.

Ha kajuh ka por ka Sorkar ka pynrem jur ïa ka jingkren jong u Symbud Myntri Rangbah u bah Prestone Tynsong da kaba pynïahap ba ki nonghikai kiba ïa khih ki long kiba bam kruiñ ïa ka jaitbynriew. Kane ka jingkren tohmet na ka liang jong u Dy. CM ka long kaei kaei ka bym lah ban pdiang bad ka pyni ruh ba kane ka Sorkar ka kheiñ poh ïa ki nonghikai jong ka jylla.

“ Lada u bah Prestone u sngew biang ïa lade haduh katta u dei ban ot shuwa ïa ka tulop jong la jong sa kren pat ïa kiwei. Haba kiwei ki jylla na kapor sha ka por ka pynkiew ïa ka tulop ki nonghikai khnang ba kin ïoh ban ai shuh ka jing shakri kaba pura, ka dei tang ha ka jylla ka jong ngi ba ngi ïohi ba ka Sorkar ka ot bad pynduna man ïa ka tulop,” ong u samla Naijar.

Ka Seng ka ai ka jingkyrshan kaba pura ïa ki nonghikai bad ka kyntu ruh ïa ki School Managing Committee jong ki skul bapher bapher ha ka jylla ba kin ai ka jingkyrshan kaba pura ïa ki nonghikai deficit jong ka skul ka jong ki bad ka ïawer ruh ïa ki khynnah skul ba kin mih shakhmat ba kyrshan ïa la ki jong ki nonghikai.

Ha kajuh ka por ka seng ka la ong ba lada ka Sorkar kan dang ïai bteng ban sngap mynthi ïa ka jingdawa ki nonghikai deficit, kan hap ban mih shakhmat ban pynbor ïa ka Sorkar ban pynurlong ïa ki mat jingdawa jong ka KJDSTA.

Leave a Reply

Your email address will not be published. Required fields are marked *