U Symbud Myntri Rangbah ka Jylla u Bah Prestone Tynsong, hynne ka sngi, ula pynshai ba ka jingkren ka jongu ha ka jingialang kam dei satia ba ula kdewkti lut ia baroh ki nonghikai baieid bad kiba donburom hapoh ka Jylla hynrei kadei thik tang ia ki nongialam jong ka Khasi Jaintia Deficit School Teachers Association (KJDSTA) bad ula buh jingkylli ruh ba kane ka jingiakhih ka i kum ka jingleh politik namar kila pynlong khnang ha ka por ba ki khynnah ki don ia ka Final Examination.
“Nga kwah ban pynshai ba ka jingkren ka jong nga ha ka jingialang kam dei satia ba nga kdewkti lut ia baroh ki nonghikai baieid bad kiba donburom hapoh ka jylla Meghalaya bad ka jingkren ka jong nga kadei thik tang ia ki nongialam jong ka KJDSTA” bad ka ong, ba u long kumne kumba u long mynta kadei namar jong ki nonghikai kiba la saindur ia ka jingim jongu bad ula kyrpad ruh ia ki nonghikai baroh ba kim dei ban sngewthuh bakla bad ym don satia ia kano kano ka jingthmu ban pynmong iano iano ruh.
“Ki la don bun tylli ki jingialang, jingiakhih bad ki dorkhas kaba kila ai bad ka Sorkar kala pyrshang ban shimkhia bad bun ki ishu kidei kiba la pyrshang ban pynbeit noh. Nga la kren pyrshah ia kito ki nongialam kiba la pynbor ia ki nonghikai ban mih sha madan bad ki don ia ka hok ha ka riti synshar paidbah ban pynlong ia ki jingiakhih hynrei kaba la pynmih ka jingkylli ia nga, kadei ba kila pynlong pat ia ka jingiakhih ha ka por ba long ‘Final Exam’ ki khynnah, kane kala ktah shibun ia ki khynnah bad pynkhuslai ruh ia ki kmie ki kpa” ong u Bah Prestone.
Ula ong ba ki lah dei ban ailad shwa ba ka eksam kan long kaba iaid beit iaid ryntih bad hadien ka eksamin ki lah ban pynlong ia kino kino ki jingiakhih ki jongki bad kane ka jingiakhih ka jongki mynta ka i kum ka jingleh politik.
Haba kylli balei ula kynnoh ba ka jingïakhih ka don ka jingleh politik, u Bah Prestone ula ong ba ka jingjied ïa u bnai Naiwieng, ha ka por ba ki khynnah ki don ha ki eksamin, ka pynmih ïa ka jingkylli.
“Lada phi long ki nongïalam kiba don ka jingkitkhlieh, balei phim pynsangeh ïa ka jingïakhih ha u bnai Naiwieng bad ap haduh ban da kut ki eksamin?” ula kylli.
Haba ai jingtip halor ka jinglong jong ki eksamin, ki don 6,902 ngut ki nonghikai Deficit kiba trei ha 2,194 tylli ki skul naduh ka kyrdan Primary haduh Higher Secondary, kumta ka bor halor ka jingsiew tulop jong ki nonghikai ka shong ha ki School Managing Committee (SMC), namar ka Sorkar ka phah ïa ka pisa sha kine ki committee bad ki SMC pat ki pyllait ïa ka sha ki nonghikai.
Ula ong hadien ba ki nonghikai kila pep ban leit sha ki skul, ki SMC kila shimti ïa ka jingkitkhlieh ban pynïaid ïa ki skul, katto katne da kaba thung nonghikai lyngba kiwei pat ki lad, katto katne pat da ka jingstad jong ki hi.
U Bah Prestone ula pynshai ruh ba ia ka jingkren jongu ha ka jingialang kadei kaba lah mait khnang (edit) bad kila shim tang ia kito ki kyntien, da ki nongpynsaphriang ia ki video khnang ban pynmih ia ka jingsngewthuh bakla.
“Ki don ruh ki riewshim kabu kiba la ot ïa kata ka bynta jong kaei kaba nga la kren, hynrei kila shim tang ïa kita ki kyntien, ngam sngew phylla, kam lei lei, phi lah ban shim tang ïa kata, hynrei kynmaw ka jingshisha kan ïeng kumba nga la kren” la ong u Bah Prestone bad ka bynrap “Nga long kumba nga long mynta namar ki nonghikai ba ieid jong nga, kiba la pynwan dur ïa ka jingim jong nga haduh mynta. Ko Nonghikai baieid, wat sngewthuh bakla ïa nga, ngam don jingthmu ban kren kum kine ki ktien ban pynmong ïano ïano”.
You may also like
-
Bat ka KSU 4 ngut ki khar Bangla, suba ba siew T.45 hajar marwei ban rungtuh na Meghalaya
-
Kynduh ki nongialam KSU ia ki nonghikai KJDSTA ban ai jingkyrshan ia ki jingiakhih
-
Ki ‘Sohpyut bad kruin’ ki don ha Secretariat ym ki Nonghikai:HYC
-
Ïashim bynta u Lat ha ka Jubili Ksiar ka Wangala Festival
-
Hiar arsut ka ïoh ka kot ba shim ram ki briew ba don ha ka bor
