Sdang ka Ri-Bhoi District Level Youth Parliament ba ar sngi

Ka Ri-Bhoi District Level Youth Parliament ka baar sngi, kala sdang hynne ha Union Christian College halor ka mat “Empowering Youth for Democratic Leadership and Responsible Citizenship” ia kaba la wan ban iashimbynta da ki samla pule na ki 9 tylli ki College jong ka Ri Bhoi District.

Ia kane ka Youth Parliament la bei tyngka da ka Meghalaya Legislative Assembly kum shi bynta jong ka jingpyrshang ban pynshlur ia ki samla ban sngewthuh bad ban shemphang ia ka rukom treikam jong ka jingsynshar paitbah.

Ha kane ka prokram yn iatai sani halor ka mat kaba kynthup ia ka “National Education Policy, 2020” bad “Social Media and Youth Mental Health: A Tool for Connection and Information or a Threat to Well-being”.

U Lamphang ka ïingdorbar thawaiñ ka jylla u Thomas A Sangma ula plie ia kane ka prorkam kum u Kongsan ha ryngkat ka jingdonlang u Government Deputy Chief Whip u Bah Ronnie V Lyngdoh, u Secretary ka Assembly u Malthus S Sangma, Principal jongka Union Christian College Dr. R.M. Manih, Coordinator ka Internal Quality Assurance Cell, Dr. J.P. Marak bad kiwei kiwei ki nonghikai.

U Lamphang ula ong, ba ka ri ka donkam ia ka sur jong ki samla, ki jingai jingmut kiba thymmai bad ki nongialam kiba hok bad ka Parliament bad ka Assembly kidei ki rynsan kaba ia ki jingai jingmut la iatai sani, la buh ia ki jingkylli bad ban pynbeit ia ki jingeh kidei la wad na ka bynta ka bha ka miat jong ki paitbah.

U Thomas Sangma ula batai ba kii aiñ ki saindur ia ki skul, hospital, surok bad ki lad aikam aijam ki sdang na ki jingkylli bad na ki jingiatai ia ki jingai jingmut bad ia ki jingpynkylla thymmai la mynjur hashwa ba kin kylla ain.

Ula ong, ba ka Youth Parliament ka plie lad ia ki samla ban shemphang ia ka kam synshar paitbah da kaba ioh ia ki jingtip kiba bniah bad pura, ban sngewthuh kumno la thaw ia ka aiñ, kumno la pynlong ia ka jingiatai bad kumno la shim ia ki rai hadien ba kala don ka jingiatai ha ka jaka ban iakynad ne iashrut.

Ula ong, ba kane ka prorkam ka hikai ia ki samla ba kin shah shkor bha, ban pynpaw ia ka jingpynsngew ban burom ia kiwei wat haba kim iahap jingmut bad kine kim dei eh tang ki sap jong ki nongmihkhmat paitbah hynrei kidei ruh ki sap kiba kongsan ha ka jingim briew.

“Ka lawei jong kano kano ka jingsynshar paitbah kan shong haduh katno ki nongshong shnong ki lah ban kren, sngap bad iatreilang” la ong u Lamphang bad ka bynrap ba ka jinglong jingman jong ka ïingdorbar thawaiñ kan shong eh ha ka jingsngewthuh bay m dei ba don tang uwei u briew uban don baroh ha u ia ka jingnang jingstad bad ki rai kiba bha kila mih na ki sur ki bapher bapher bad na ki jingiatai kiba khuid.

Ha kaba iadei bad ka jingdon ki jaka synshar khaddar tynrai ha Meghalaya, u Lamphang ula ong, ba kidei kiba la tei lyngba ka jingiatai, jingmynjur lang bad ka jingburom ia ka jaidbynriew bad ka banjur ba ka kam synshar paitbah kam long kaba thymmai ia ki paitbah ka Jylla hynrei kadei shi bynta na kaei kaba kila ioh pateng naduh na ki por hyndai hynthai.