Sei ka Congress da u Bah Dominic Mynsong na Mawhati

Katba nang jam ki sngi shajan ka ilekshon MDC 2025, ka Party Congress ka la nang pynbna ia ki kyrteng jong ki kyrtong ban ai reng ha kane ka ileksion ha kaba la pynbna pat ia ka kyrteng u Bah Dominic Mynsong kum u kyrtong ban aireng na Mawhati Konstituensi. Ha ka jingialang kaba la long ha ka shnong Jatah, hapoh ka thaiñ Mawhati, ki nongialam ka Congress ba lamkhmat da u Bah MG Kharshanlor, District President, Bah Phrangsngi Syngkli, President ka Jirang Block, Bah Sunlight Shadap, Working President ka RBDCC, Bah John Lamarai, President ka Mawhati Block Congress nalor kiwei kiwei ki nongialam ka party Congress.

Haba kren ha kane ka sngi, u Bah Dominic Mynsong u la pynpaw ia ka jingsngewskhem kaba khraw ban ioh kheit ia u soh ka jingjop ha kane ka ileksion MDC kaban wan ha kaba u la pynpaw ruh, ba ka Congress ka dang ieng skhem ha la ka nongrim ban shakri paidbah watla ki la shah iehnoh bein ha u MLA/MDC Bah Charles Marngar u ba la pyniasoh sha ka party NPP khlem da suidñiew ia ka sur u paidbah u ba la kyrshan ban pynjop ia u kum u nongmihkhmat na ka thaiñ Mawhati.  Na ka liang ki nongialam ka party Congress haba kren paidbah, ki la pynskhem ia ka kyrteng u Bah Dominic Mynsong kum u kyrtong u ba lah ban wanrah biang ia ka jingjop lyngba ka jingieid u paidbah namar ka Mawhati Konstituensi hi ka dei ka Konstituensi kaba ieid bad shaniah ia ka party Congress naduh ki snem kiba rim.

Ki la pynpaw ruh, ba ka party Congress lyngba ki nongialam bad ki nongkitkam ki la nang treishitrhem ban nang pynkhlaiñ ia ka party wat hadien ka jingiehnoh kaba shiteng por da u Bah Charles Marngar u ba ki paidbah ki la pynjop don burom na ka party Congress kum u MLA bad MDC, ki la bynrap ruh, ba ka party kan nang kiew rasong na ka jingiai kyrshan ba radbah jong ki paidbah ka Mawhati Konstituensi.