Iakynduh ki heh BJP ia u Rajnath Singh ban pan jaka shipai ban shna surok ha Shillong

Ki Nongialam ka Meghalaya Bharatiya Janata Party (BJP) hynne ka sngi ki la leit kynduh ia u Myntri kam iada Ri u Rajnath Singh ha Nongbah Delhi bad pan ia ki jaka shipai kiba don ha ka nongbah Shillong khnang ban lah pynduna ia ka jingdheng kali. Ïa kane ka kynhun la ialam da u MLA ka BJP u Bah Sanbor Shullai ha ka jingdonlang u President ka BJP Meghalaya u Rikman G. Momin, u Vice President ka BJP Meghalaya Bernard Marak bad kiwei kiwei.Kane ka kynhun ka la iatai sani bad u Myntri halor ka jingdonkam ia ki jaka jong ki shipai kiba don ha nongbah Shillong na bynta iarap pynduna ia ka jingdheng kali ha nongbah Shillong. Ki la pynpaw ba ki jaka ba kynthup ia ka Lady Keane Road ban mih sha Police Bazar, ka Shillong Peak Road, ka Umpling Bridge Road ban mih sha Chief Engineer Office, Shillong bad ka Footpath hajan ka Anjali Cinema Hall.

U Bah Sanbor Shullai ula ong, ba lada ai ia kitei ki surok ban pyndonkam ban pyniaid kali ki paidbah kan iarap shibun ban pynduna ia ka jingdheng kali. U bynrap katto katne ki jaka ka tnad shipai kaba don hajan Umsohsun ban mih sha lad Rhino lah ban pyndonkam ban tei jaka pynieng kali bad kane kan pynduna ia ka jingdheng kali hajan ka Khyndailad. U MLA ka BJP ula ong, ka jaka hajan ka Anjali Cantonment Beat House lah ban pyndonkam na bynta ban pynieng ia ki kali bad na ka bynta ki nongdie madan. Lah ban siew ruh ia katei ka bai jaka da kaba iaid katkum ka Land Compensation Rules jong ka Defence Ministry. U Bah Sanbor ula iathuh na ka liang u Myntri ka tnad Defence ula pynthikna ba yn sa khmih bniah ia kane ka kam bad na ka liang ka seng BJP ruh kan iai bteng ban bud dien haduh ba kan da urlong.

Ka kynhun jong ka BJP ka la pynsngew ha u Myntri ka Sorkar Pdeng halor ka jingker sainar ia ka jaka hajan Rhino Point da ki shipai bad u Myntri ula kular ban shimkhia ban peit bad ula bthah ban ai ki jingthoh halor ka jingeh ki paidbah. Ka kynhun ka BJP ka la pyntip ba shen kan leit ban iakynduh ia u Myntri Rangbah ka jylla ban kyrpad ban thaw ia ka State Level Committee ban peit na bynta ban ioh ki jaka shipai ha ka nongbah Shillong.