Halor ka thungkam Staff Nurse ha MCH Nongstoiñ

Ka Enquiry Committee kaba la thaw ban tohkit halor ki jingkynnoh kiba ïadei bad ka jingthungkam ia ki Staff Nurse ha MCH Hospital, Nongstoin, ka khot ïa baroh ki kyrtong kiba la shah shortlisted bad kiba la buh por ban wan ïashim bynta ha ka interview, ban wan shakhmat ban ai ïa ki jingpynshai jong ki ne ban submit ïa ki jingujor halor kino kino ki jingkynnoh shaphang ka jingdon jong ki jingduna ne jingbymhok ha ka rukom pynlong ïa ka rukom khot thungkam.

Ka Enquiry Committee kaba don ar ngut ki dkhot, kaba kynthup ïa u Executive Magistrate Bah E. Lyngdoh bad u Superintendent of Police, West Khasi Hills District Bah H. Kharkongor ka dang pynlong ïa ka jingtohkit halor ki jingkynnoh kiba ïadei bad ka jingbymhok, ka jingdawa ne pdiang ïa ka pisa kaba be-aiñ, ka jingshah thied pisa (bribery), ka jingpynbor pisa (extortion) ne ka jingshah pynbor (coercion) ha ka jingïaid jong ka rukom jied nongtrei.

Ki kyrtong kiba la mad ïa kino kino ki jingdawa pisa kaba be-aiñ, jingpynbor pisa, jingpynbor ne kino kino ki rukom leh bymhok shuwa, ha ka por ne hadien ka interview, ki lah ban wan mih hakhmat ka Enquiry Committee ban ai ïa ki jingpynshai, ban submit ïa ka jingujor ha ka dur jong ka jingthoh, lane ban ai ïa ki sakhi kiba lah ban kyrshan ïa ka jingkynnoh, kynthup ïa ki audio/video recordings, message logs, bad ki jingtip shaphang ki financial transactions, lada don.

Ka jingpynrung ïa ki jingpynshai jong ki kyrtong kan long naduh ka 5 tarik Risaw 2026 haduh ka 9 tarik Risaw 2026, naduh ka 10:00 mynstep haduh ka 4:00 janmiet, ha Room No. 108, Office of the Deputy Commissioner, West Khasi Hills District, Nongstoin.

Ka Enquiry Committee ka pyntikna ba ia ka kyrteng ne identity jong ki kyrtong kiba ai jingpynshai bad ki sakhi jong ki, yn buhrieh bad sumar bha ha ka rukom kaba kyrpang, khnang ban ïada ïa ki na kano kano ka jingshah pynshitom, jingshah pynibor ne jingshah lehbeiñ.

Ka Committee ka kyntu ïa ki kyrtong kiba don bynta ha kane ka kam ba kin wan shakhmat bad ïarap ïa ka Enquiry Committee ban pynthikna ba ka rukom thungkam kan long kaba hok, kaba shai bad katkum ka jingïoh bynta lyngba ka merit.

Ia kane la pynmih na ka bynta ka jingmyntoi paidbah, da ka hukum jong ka Committee Enquiry.