Kylla ka trok kit dewbiat ha surok Umran, phet krad u Driver

Kawei ka trok heh ba don ïa u registration number AS 01NC 8537 ka la kylla lyndang hapdeng surok bah ha Umran Dairy ha ka por kumba 3 baje janmiet, kaba la wanrah ïa ka jingthut ha ka leit ka wan jong ki kali ha katei ka surok.

Kaba kham phylla ka long ba u nongñiah jong katei ka trok ula phet krad na katei ka jaka hadien ka jingjia bad ym shym la lap dien shuh ïa u.

Katkum ki khubor ba la ïoh, katei ka trok ka dei kaba kit ïa ki byrni dewbilat jong ki company Taj Cement bad Black Tiger Cement. Ka trok ka la mih na Guwahati bad ka dang thmu ban pynpoi ïa ki mar sha kawei ka company kaba don ha Lumshnong.

La ïathuh ba haba ka trok ka la poi ha katei ka jaka kaba long khongwaiñ ha Umran Dairy, u nongñiah u la pynher stet ïa ka truck haduh ba um shym la lah shuh ban tehlakam ïa ka trok, kaba la pynlong ïa ka ban kylla lyndang hapdeng surok.

Na katei ka jingjia kam shym la don kano kano ka jingmynsaw ne jingjia kaba sngewsih, Hynrei, u nongñiah jong katei ka trok u la phet krad noh na katei ka jaka hadien ka jingjia bad haduh mynta ym pat shym la lapdien ïa u.

Na ka liang ki pulit ka Umsning Police Station ki la poi mar-mar sha katei ka jaka ban pynlong ïa ka jingtohkit halor katei ka jingjia. Ki pulit ki la pynkynriah noh ïa katei ka trok kaba la kylla lyndang, khnang ban pynkylluid biang ïa ka surok bad ban pynsuk ïa ka leit ka wan jong ki kali.