Ka thong u Moonlight Pariat ban pynim biang ia ka District Council

U Moonlight Pariat uba juh long MDC san samoi lynter bad juh bat ruh kum u CEM ka JHADC, tangba ula shah rem noh ha u snem 2019, mynta ka kynti ula mih ban aireng biang ia kane ka election na ka 19-Jowai South kum u kyrtong shimet namar ba u iohi ba ka District Council ka la khyllem kumta u kwah ban pynkhie im biang ia ka. Haba kylli ia ka jingpynkhreh u ong ka jingpynkhreh mynta ka kynti dei naka bynta ban jop, khnang ban ioh pynkhie im biang iaka Council kumba ka long mynshwa.

U ong ha ki 6 snem naduh u 2019 haduh mynta ki nongtrei ka council ki mad jingeh haba iadei bad ka tulob, kumta ka jingkwah jong u ban pynkhie im biang iaka Council dei ba u iohi ba ka jingma kam ap tang iaki nongtrei hynrei wat iaka jaitbynriew ruh, ioh lehse kan poi ka por ba naka jingtlot palat jong ka yn hap shimti ban pyniaid da u Governor ne ka sorkar India bad ha kata ka por lada ka pynduh noh iaka Six Schedule kan long ka jingduhnong bakhraw namar ynsa duh noh iaka jinglong trai wat iaka khyndew ka shyiap ka dustur riti, bad ngin sa ia ryngkat ka jinglong jingman bad ki rithor ha kaba ka khyndew ka shyiap kan long jong ka sorkar.

Kumta ha kane ka kynti u ong, donkam shibun ki aiñ ban buddien nangne shakhmat la kiba donkam ban pynkylla khnang ban pynsuk iaka district council iaka jaitbynriew, bad ban ioh ka direct funding naka sorkar kmie.