Ym dei ban shim ‘phone call’ na ki briew bym ithuh: SP

U Superintedent of Police (SP) ka East Khasi Hill u Bah Vivek Syiem hynne ka sngi ula kyntu ia ki paidbah ba kim dei ban ngop ha ki jingpynbiej ki riew sniew ba byrngem ban kem (digital arrest/physical arrest) tang ban ioh dawa pisa. U Bah Vivek Syiem ula pyntip ba ki la don bun jait ki jingthok pisa kaba ki la ioh pdiang, ha kaba ka la don ruh ka jingbyrngem ban kem ia ki briew kiba lui-lui bad hadien ka dei tang ban dawa pisa. U la iathuh ba kitei ki rukom dawa ki kynthup ia ka ‘Parcel Interception’ ne ka jinglap ia ka song tiar, ha kaba ki briew ki ioh pdiang ia ka phone call kaba kam ba ka dei na ka FedEx ba ki la suba jur ia ka song ba ka don ia ki tiar kiba be-ain (droks ne ki tiar pynmynsaw) ia kaba ki la lap bad ka dei kaba don bynta ka kyrteng bad ka jaka sah ka jong ki. Kumta kine ki riew sniew ki la nang pynheh ia katei ka kam da kaba pyniasoh ia ki briew bad ki pulit/CBI/ED/NIA, kiba byrngem ban kem lada kim treh ban ai ka jingiatreilang.

Ki riew sniew ki lah ban kam ba u dkhot ka iing ula shah kem ne u donkti ha ki kam sniew bad ki dawa pisa mardor na ka bynta ban pyllait noh khnang ba kin lait na kino kino ki jingshah ktah ha ka ain.Ula pyntip ba ki briew kiba shah pynngop ki la shah kynnoh ba la pyndonkam bakla ia u Aadhaar number ne u phone number na ka bynta ki kam sniew bad ki la donkti ha ki kam sniew ban pyniaid pisa thok, ban khaii briew bad pynbor ba ki dei ban siew ka kuna ban pyllait noh ia ka kyrteng jong ki.Nalor kane, ki la don ki briew ba la ioh pdiang ia ka phone call bad la kynnoh ba la pyndonkam lyngba u phone number jong ki ban pynsaphriang ia kiei kiei kiba khlemrain bad kine ki riew sniew ki la kam ba ki la dep ujor ia ka ejahar pyrshah ia ki bad ki dawa pisa ban pyllait noh ia ka kyrteng jong ki khnang ba kin lait na ka jingshah kem.Ula ong ba ki la don ruh ki jingjia, ba ki riew sniew ki leh video call thok ha kaba ki la ak kum ki nongbishar ne ki ophisar ba bat ia ka ain, ha kaba ki pyni ia ki kot kiba shu thok bad shukor bad ia ka Non Bailable Warrant of Arrest. Ki la byrngem ia ki briew ba kin pynshitom katkum ka ain bad ki dawa pisa ban lait na ka jingshah kem ne ban mad shuh shuh ia ki jingeh.

Nalor kane, ki briew ki la shah pynbeij ba ki don hapdeng jong ka jingshah tohkit halor ka jingpyndonkam bakla ia ka pisa, ka jingpyniaid thok ia ka pisa ne ban lait na ka jingsiew ia ka khajana ne Tax, ha kaba ki la pyni ia ka AADHAR card jong ki briew kiba shah pynngop (ia kaba la pdiang hi da kiba la shah pynngop). Kine ki riewsniew ki pyndonkam ia ki buit ba lada ki pulom ban ai ka jingiatreilang kin shah kem noh mardor. Kumta u SP ula kyntu ia ki paidbah ba kin long husiar haba ki shim ia ka phone call na ki briew ba kim ithuh bad kim dei satia ban ai ia kino kino ki jingtip shimet ne kiba ia dei bad ka Bank. Lada don kiba la ai ia ki jingtip halor ki Bank ki jong ki, ki lah ban phone mardor ha u 1930 ne ban phah ia ka jingujor ka jong ki ha ka cybercrime.gov.in ne ha ka sancharsaathi.gov.in.