Tih mawshun be-ain ka Amrit Cement, bthah ka HC ban tohkit

Ka Iingbishar Meghalaya High Court hynne ka sngi, ka la hukum ia ka Sorkar Jylla ban thung kynhun tohkit halor ka jingkynnoh pyrshah ia ka Amrit Cement Industries Limited ba ka tih mawshun be-ain ha Jaintia Hills. Ia kane ka hukum la pynmih da ka Division Bench jong ka Iingbishar kaba la khlieh da u Chief Justice IP Mukerji bad u Justice W Diengdoh hadien ba ki la bishar ia ka Public Interest Litigation (PIL) ba la mudui da u Ranjit Chandra Goswami. Ka iingbishar ka la ong ba une u nongmudui, ula kam ba u dei u briew ba don ka mynsiem ban shakri paidbah, bad ula kynnoh ba ka Amrit Cement Industries Limited ka la tih mawshun be-ain ha Ri-lum Jaintia.

Ka iingbishar ka la pynpaw ruh ba hashwa ba kan pynmih ia kano kano ka hukum, ka kwah ban ioh sngew ruh na uba shah mudui pyrshah bad ka jingwan mih u nongshah mudui ia uba la dep hukum ban phah ia kane ka hukum. Ka iingbishar kala bthah ia ka Sorkar Jylla ban shim ia kane ka jingmudui kum ka jingujor, ban pynlong ia ka jingtohkit bad ban aiti ia ka kaiphod sha ka Iingkashari hashuwa ka sien ban shong tian bishar biang bad la bthah ba dei ban ai notis ia u nongshah mudui kaba dei ka Amrit Cement Industries Limited.

Nalor kane la bthah ruh ia ka jingshakri na ka Meghalaya State Pollution Control Board (MSPCB) bad ka North Eastern Development Finance Corporation Ltd. Ka iingbishar kala bthah ruh ia u nongmudui ba un ai ia ka Affidavit kaba bniah halor ka kam ba u trei hashuwa ban shong bishar ia kane ka kam.