Palat 7 lak ki khynnah skul ba ioh jingmyntoi na ka skhim PM Poshan

Ki don ym duna 7 lak ngut ki khynnah skul hapoh Meghalaya ba ioh jingmyntoi na ka skhim PM Poshan lane ki skul kiba ai bam ia ki khynnah skul. Ka skhim PM Poshan lane ka Midday Meal ka dei ka skhim Sorkar Pdeng ban pynthikna ba ki khynnah skul Sorkar bad ki Government Aided School naduh ki Pre-Primary bad naduh Class I haduh Class VIII ki ioh bam ha skul. Ïa kane la pyntip da u Director ka Directorate of School Education and Literacy (DSEL) u Swapnil Tembe hadien ba lawai ka jingïalang halor ka jingpyntreikam ia ka skhim PM Poshan hapoh Meghalaya. Haba kren sha ki lad pathai khubor u Swapnil Tembe ula ïathuh haduh u snem 2024, ka Sorkar Jylla ka la mang T.130 klur ban pyntyllun ia ka skhim PM Poshan hapoh Meghalaya.

Ka mang tyngka ba T.130 klur ka kynthup ba ai da ka Sorkar Pdeng bad ka Sorkar Jylla bad ïa kane ka mang tyngka la pyndonkam ha baroh ki liang kynthup ban siew bainong jong ki nongshet bad ki nongiarap (Cook-cum Helper) ban thied bad kit marbam lem bad kiwei ki jingdonkam.“Lada khein kyllum ym duna 7 lak ngut ki khynnah ki don hapoh Meghalaya ba ioh jingmyntoi na ka skhim PM Poshan kaba dei ka skhim jong ka Sorkar Pdeng ban pynthikna ba ki khynnah ki ioh bam ha skul” la ong u Tembe. Halor ka jingkynnoh ba don ki skul bym pyntrei hok ia ka skhim PM Poshan, u Director ka DSEL u la ong, ba ka tnat ka la leit jurip ia ki skul ban lap  ia ka rukom pyntrei kam ïa kane ka skhim.

U Director ula ïathuh ba ka tnat pule puthi ka la thung da ki Special Staff, ki Ophisar bad ki Special Multitasking Assistant ban leit jurip ia ki skul ban lap ia ka rukom pyntreikam ia ka skhim PM Poshan hapoh Meghalaya.“Ngi la pynkhlain ia ki nongtrei hapoh ka skhim PM Poshan ban leit jurip kynsan kynsan ha ki skul ban lap ia ki jinshisha ka rukom pyntreikam ïa ka skhim Pohshan” u la ong.