Mynta yn thep vote ban jied 58 ngut ki MDC ha KHADC-JHADC

Palat 13 lak ki paidbah ha ri lum Khasi-Jaintia kin thep vote mynta ka sngi ban jied ia 58 ngut ki MDC ha ki ar tylli ki District Council ha KHADC bad JHADC, kiba don mar 30 ngut ki dkhot ha ka iing dorbar kynthup mar uwei ba shu shieh.Ka ilekshon MDC mynta u snem ka kham pher haba nujor bad ki ilekshon ba la dep, na ka jingmih ka seng sain hima thymmai ka Voice of The People Party (VPP) kaba la pynkhih win bad pynkyndit ia kiwei ki seng sain hima ha ka Jylla ha ki jingialang ilekshon ha ki khyndiat sngi ba la dep.Ha kane ka kynti ki don 272 ngut ki kyrtong ba iakhun ilekshon MDC kynthup 19 ngut ki kynthei, kata ha KHADC158 ngut bad ha JHADC 114 ngut. Na kine ki paidbah kin jied 58 ngut ki ‘rang bad ki ‘thei ba kynsai ba mihkhmat ha ka iing dorbar ka KHADC bad JHADC.

Katba ki nongthep ki don 13,08,818 ngut kynthup 632347 ki shynrang bad 676467 ki kynthei bad 4 ngut ki bah/kong (third gender). Ha KHADC ki don 996518 ngut, shynrang 481268 bad kynthei 515247 ngut bad 3 ngut ki bah/kong ne third gender, katba ha JHADC ki don 312300 ngut, shynrang 151079 bad kynthei 161220 bad iwei I bah/kong. Ki jingthep vote lashai ka sngi 21 tarik Rymphang kan sdang naduh 7 baje mynstep ha ki 2146 ki polling Station ha KHADC bad JHADC. Ha KHADC ki don 1669 ki polling station katba ha JHADC ki don 477 ki Polling Station.

Ka sorkar Jylla ka la pynkhreh ia ki lad pahara ba jur ha baroh ki Polling Station lashai ka sngi, khamtam ha ki 129 tylli ki Polling Station ba don jingma ha KHADC bad 95 tylli ki Polling Station ha JHADC ban lait na ki jingkulmar bad ban pynlong ia ka ilekshon kaba iaid beit bad kaba jop.