Yn iatreilang ki pulit bad ki kynhun Balang ban iakhun pyrshah ia u drok

Ka sorkar jylla ryngkat bad ka DREAM Mission hynne ka sngi ki la lum ia ka jingialang amir jingmut bad ki nongialam niam ka jylla ban iakhun pyrshah ia ka jingjyllei ki nongdih drok ha jylla Meghalaya. Ha kane ka jingialang kaba la long ha State Convention Centre, la iadonlang u Myntri ka tnad Social Welfare u Bah Paul Lyngdoh, u Commissioner & Secretary ka jylla u Sampath Kumar, u Director ka DREAM Mission u Bah F Kharshiing, ki nongialam niam bapher bapher ha kaba ki la iasyllok ban iatreilang ban iakhun pyrshah ia u drok ban pynbiang ia ki lad jingsumar bad ban pynsaphriang ruh ia ki jingtip ha ki skul bad ki jaka mane Blei shaphang ka jingma jong u drok ba long u jingdih ba sniew ba pynjot ia ki longiing longsem. Ha kane ka jingialang la rai ba ki kynhun seng niam kin iatreilang bad ki Pulit ban ithuh ia ki jaka ba jyllei ka jingdih drok bad ban shim ia ki sienjam ban tehlakam ia kane ka jingsniew bad ban pynlong ia ki prokram pynshai paidbah, ki jingialang ai jinghikai ia ki samla shaphang ki jingma jong u drok bad yn phah ruh ia ki briew ba kwah ban iaid noh ha ka lynti kaba dei sha ki Detox Centre bad la pyntip ruh ba ka sorkar kan ai jingiarap T.32,000 na ka bynta kito kiba leit phah sumar shabar jong ka jylla.

U Bah Francis Kharshiing, ula ong ba ki nongialam niam ki don ka bynta kaba khraw ban pynsaphriang ia ka jingtip bad kumjuh ban btin lynti ia ki riewngeit ki jong ki ban iaid ha ka lynti kaba dei bad khamtam ban iasnohkti lang ban iakhun pyrshah ia ka jingpyndonkam ia u drok. Ka sorkar ka la mang pisa ha ka wat ba nyngkong T.50 lak ban pyniadon bynta ia ki Balang ban tehlakam ia kane ka jingeh. U Bah Paul Lyngdoh ula ong ba ka Sorkar Jylla ka la lum ia ki jingialang bad ki kynhun niam bad ki kynhun bapher bapher da ka jingthmu ban iakhun pyrshah ia ka jingjyllei u drok bad ki nongdih droks ha ka jylla bad ula pynshai ba ka long kaba bakla ba ka sorkar kala shu kut tang ha ka jinglum ia ka jingialang bad kam shym la leh eiei pat namar ka sorkar jylla kala shim ia ki sienjam ban iakhun pyrshah ia u droks bad kam dei satia ba ka shu kren tang da ka ktien hynrei kala leh ruh da ka kam. U Bah Paul ula ong, ba ka Sorkar kala thaw ia ka Anti-Narcotics Task Force (ANTF) ba 40 ngut ki dkhot, ka ban pynleit jingmut beit thik ia ka jingtreikam tang ha ki kam ba iadei bad u droks.

Ula ong, ba ka Jylla Meghalaya kala wanrah ïa ki aiñ kiba kham pyrkhing ban set ïa ki nongleh bymman ba la kem bunsien bad kila don saw ngut ki briew kiba la shah set phatok hapoh kine ki kyndon ain kiba thymmai bad ka sorkar kala pynbiang ruh ia ka jaka na ka bynta ban tei ia ka Rehabilitation Centre bathymmai bad ka Sorkar kan sa ai ia ka pisa ba kin pyntreikam ia kine ki jaka ai jingsumar. Ula pyntip ruh ba ka Sorkar kala nang pynkhlain ruh ia ka jingkem droks ha ki jaka rung bad jaka mih ha Jylla da kaba pyntreikam ia ki Scanner Vehicle bad ki ksew kiba tbit ban sma ban lap ia u droks bad ka Sorkar kala pynkhie im biang ia ki Village Defence Party (VDP) bad la pynkiew ia ka jingsiew ba man la u bnai sha ki dkhot VDP na ka T.800 sha ka T.3000 nalor ki tiar kiba kham bha bad ka sorkar kan pynkhlain ruh ia ka jingtreikam jong ki Dorbar Shnong ha ka jingiakhun pyrshah ia u droks.