Ki pulit ba wan kem ki riam paidbah, ong u GS ka NEHUSU

Ki samla pule ka skulbah North Eastern Hill University (NEHU) hynne ka sngi ki la pynlong ia ka jingiaid paidbah bad pynkut da ka Signature Campaign ban pyrshah halor ka jingshah kem u President ka NEHUSU u samla Sandy Sohtun. Ia ka jingiaid paidbah la sdang na Library bad la pynkut ha Gate 2 ha kaba ki samla pule ki rah ruh da ki lama iong ban pyrshah ia ka jingwanrah ia ki Pulit bad CRPF ba kieng atiar hapoh ka phyllaw jong ka skulbah NEHU. Ha ka jingiaid paidbah ki samla pule ki la pyrta ia ki ktien pynrem kynthup “Ngi ieng pyrshah ia ka jingwan ki Pulit kiengatiar beain hapoh ki jaka pule, ka jingwanrah ki bor pahara ba kiengatiar ha ki University ba khlem nongrim ka buh jingma ia ka jingshngain bad ka jinglong laitluid ki jaka pule. Ngi ieng skhem ban pyrshah ia ka jingpyndonkam bakla ia ka bor da ki briew ka ain ha ka dur jong ka jingkem beain” nalor ka jingpynrem ïa u Vice Chancellor ka NEHU u Prof PS Shukla.

Haba kren sha ki lad pathai khubor u General Secretary ka NEHUSU u samla Toniho Kharsati ula ong, “Ngim lah ban pdiang ia ka jingkem ia u Sandy Sohtun na ba kim shym la iaid katkum ka lynti ba dei. Ki Pulit ki la wan kem ia u Sandy da kaba phong jain iing. Ki khlem lah ban pynithuh ia lade kum ki Pulit bad ba ki la wan ban kem ia u Sandy ha ka por ba kem ia u Sandy ki la kem ruh ia uwei u samla pule hynrei hadien la pyllait noh ia u ha Gate-V”. U Samla Toniho ula ba ka NEHUSU ha ryngkat bad ka KSU-NEHU Unit ka pynrem jur ia kane ka jingleh ki Pulit. “Ngim long pyrshah ia ka tnat Pulit naba ki Pulit ki wan hangne ban peit ia ka shongsuk shongsain hynrei ka kam hangne ka long haba ki Pulit kim lah ban wan da ka uniform haba kem briew ka dei kaba la pynmih ia shibun ki jingkylli” u la ong.

Haba pynrem iaki Pulit bad CRPF, u General Secretary ka NEHUSU u la ong “Tang ban iada ia uwei u Nonghikai, phi wanrah ïa palat 100 ngut ki Pulit bad CRPF. Ka jingshah kem u Sandy ka dei tang ka jingkynnoh kat haduh mynta, ki Pulit ki dang tohkit ia kaei kaba jia, kaei kaba donkam ban niew kyrpang ia ka. Nalor kata, ka jingwanrah ia ki bor pulit la leh khlem ka jingbit jong ki bor pyniaid ka University. Kila shu wan bad sdang kem ia ki samla pule bad iaid pahara ha ki hostel”. “Ngi long kiba kloi ban iatreilang. Lada phi kwah ban tohkit, ngi long kaba kloi ban ai ka jingiatreilang ba pura hynrei ngim lah ban pdiang ia kane ka jingwan sha ka University jong ngi bad shu kem ia ki samla pule jong ngi” u la ong.