Kem ki pulit i’u Rangbah ba pyniap ia ka para ha Pyndenumsaw

Ki pulit ka Thanad Kynthei Mawkyrwat ha ka Sngi Balang ki la kem noh ïa u Bailing Wahlang (62 snem ka rta) na ka shnong Pyndenumsaw, South West Khasi Hills District uba la phet rieh noh hadien ba u la dung ïap ïa la kajong ka para, ka Snity Wahlang (56 snem ka rta) ha ka step phyrngap jong ka Sngi Ba-ar ha kawei ka jaka ha Mawkhan, kaba hap hapoh ka shnong Pyndenumsaw.

U Superintendent of Police ka South West Khasi Hills District, u Bah B. Jyrwa u la ïathuh ba ïa u Bailing Wahlang la ïoh ban bat da ki paitbah shnong jong ka shnong Pyndenumsaw hynne ka step ha ka por mynstep na ka shnong Rohbah bad mar ïa ïoh jingtip ki pulit ki her wut wut ban leit kem noh ïa u.

Ha ka jingtohkit, utei u runar u la phla ba ule leh ïa katei ka kam ban pynïap dusmon ïa la kajong ka para bad ki pulit ki la kurup noh ïa ki jaiñ phong jong u la leh ruh ïa ka blood sample katkum ki kyndon jong ka aiñ.

Shuh shuh haba bteng ban tohkit bniah, u Bailing u la mynjur ba u kloi ban ïalam mon sngewbha ïa ka kynhun pulit sha ka jaka ba la buhrieh ïa ka tiar ba u pyndonkam ban pyniap ia la ka para bad ki pulit ki la kyrpad ruh ia ka Iingbishar ban ailad ‘police custody’ shisngi namar ki donkam ban leit ïalam ïa u sha ka jaka ba u pynïap bad ban pyni kumno u leh ia katei ka kam runar bad ban lap shuh shuh ïa ka daw kaba la pynlong ïa u ban leh ïa kane ka kam runar.

Kum ban shu pynkynmaw ba u Bailing Wahlang ha ka step jong ka 14 tarik u Naitung 2026 u la dung ïap da ka tari ïa la ka jong ka para, ka Snity Wahlang kaba don hynriew ngut ki khun na ka shnong Pyndenumsaw, South West Khasi Hills District.

Ia ka kong Snity Wahlang kaba la mynsaw jur la lap da ki paitbah shnong ha kaba mar mar ki la pynkit noh sha Civil Hospital Mawkyrwat hynrei kaba sngewsih ka long ba ynda poi ha ka jaka sumar u doktor u la pynbna ba ka la dep khlad lypa.