Ka Lauritz Knudsen Electrical & Automation ka la pyllait paidbah ia kawei na ka jong ki mar ki mata kaba batai ia ka rukom treikam jong ki ia kaba la ap khmih lynti bha ban ai bor ia ki jaka kiba kiew sted jong ka India kaba long ka rukom treikam kaba radbah ban pyntyllun ia ka jinglah ban ioh pyndonkam ia ka teknology bad pyniar ia ki lad ki kabu ha India lyngba ka jingiatreilang bad ki karkhana

Ka Lauritz Knudsen Electrical and Automation, ka kompany ba ha khmat bha ha kaba iadei bad ka jingpynmih ia ki tiar ki tar ha India bad ka jingpynmih ia ki kor ki bor kiba lah ban treikam hi, mynta ka sngi ka la pyllait paidbah ia ka thup jong ki tiar ki tar bad ki kor ki bor da ka jingthmu ban nang kyntiew shuh shuh ia ki karkhana kiba kongsan bad ki jaka kiba kiew sted bha. Kum shi bynta jong kane ka sienjam treikam kaba don bha ka jingangnud, ka kompany kan leit sha ki 30 tylli ki nongbah kiba don bun ki karkhana ha kylleng ka ri—ban ioh ban iakren bad ki nongialam jong kitei ki nongbah, kito kiba iadon bynta ha ka kam, bad kito kiba trei iatreilang bad kiwei pat ban kyntiew ia ka kam khnang ban pynsted ia ka jingpyndonkam ia ka teknology ha ki jaka pdeng kiba don ki karkhana ha India Da kaba phai khmat bha sha ka jingpynmih ia ka voltage kaba duna, ki kor ki bor kiba iarap ban pyntrei ia ki kam da lade hi khlem da donkam ban leh da ki briew bad ki lad ki lynti na ka bynta ka rukom pynmih bording kaba thymmai, ka Lauritz Knudsen ka pyntyllun sha khmat ia ki kam kiban wanrah jingkylla lyngba ki bor teknology kaban sam shaduh ki kam karkhana kiba long u budlum jong ka India. Kane ka jing pynbna paidbah ka pyni ia ka jingtreikam ba radbah jong ka kompany ban pynlong ia ka India ka ri kaba la jam sha khmat ha kaba iadei bad ka teknology, kaba lah ban long ka ri kaba biang ha ka ioh ka kot, bad pynlong ruh ia ka India ka ri kaba don ia ka jingpynmih bording katkum ka juk ba mynta, kaba iahap ruh bad ka thong jong ka sorkar kata ka Viksit Bharat 2047. “Ha Lauritz Knudsen, ka jingthmu jong ngi ka long ban pynmih ia ki kor ki bor teknology kiban nang pynkup bor ia ki nongthied ba kin lah ban trei ia ka kam ha ka rukom kaba shngain, kaba sted, bad kaba katkum ka juk. Lyngba ka jingpyni nam ia ki tiar ki tar, ngi ngeit ba ngi nang pynskhem ia ka jingngeit jong ngi ba ki buit stad treikam thymmai kidei ban long kiba baroh ki lah ban ioh ban pyndonkam lang, ba lah ban pyn iahap bad ki kam, bad iadei ruh katkum ka jingdonkam ba kyrpang jong ki thain ha kylleng ka ri India. La ka long ka jingpyndonkam ia ka kor ba tylliat hi ia u khaw ha Raipur, ka jingpynmih ia ka bor ban pyniaid ia ka kor thain jain ha Coimbatore, ne ban pynbha ia ki kor ki bor katkum ka juk mynta ia ka karkhana ha Pune, ki tiar ki tar jong ngi ki long kiba la saindur bad thain ban wanrah ia ka jingbha,” ong U Naresh Kumar, COO, Lauritz Knudsen Electrical and Automation.

“Da ka jingkdew ba ka jingpynmih ia ki tiar ki tar eletrik ha India ba kan kiew da kumba palat USD 95 billion kat ha ka snem 2029 bad ka jingdon jong ki karkhana kiba don ki kor ba treikam hi khlem da hap shuh ban leh da ki briew ba kan kot sha ka USD 39.65 billion kat ha ka snem 2033, ka jingiaid ka jingtrei ruh ka long kaba shait. Ki nongpynmih ia ki tiar ki tar ha India ki la dep bei tyngka lypa 35% na ka mang tyngka na ka bynta ki kor ki bor ka juk mynta—kham tam shuh shuh ban ia kiwei pat ki ri ka pyrthei. Kane ka jingkylla kam dei kaba tang ha ki nombor; ka paw lyngba ka jingiaid sha khmat jong ka ri ban ioh ia kiei kiei kiba katkum ka juk, kaba kham biang ha ka jingtreikam. Da ka jingpyniahap bad ka thong jong ka Viksit Bharat 2047, kumta ma ngi ym tang ba ngi pynmih ia ki tiar ki tar—ngi iarap ban pynkylla ia ka India sha ka ri kaba iaid katkum ka juk, kaba khuid, bad kaba la pynkhreh na ka bynta ka lashai,” u bynrap.