Ka CM Solar Mission ban pynbiang bording ha ki shnong ka Jylla

Ka Chief Minister’s Solar Mission kaba la sdang pyntreikam ha u Nailar 2023 kala nang iaid shaid shaid ha ka jingpynbiang iaki jingdonkam baroh ban lah ai ia ka bording kaba khuid sha manla ki shnong ka Jylla Meghalaya. Haba pyntip ïa kane u Myntri ka tnat Bording u AT Mondal u la pyntip ba ka jingkhot Tender ban pyndep ïa kane ka skhim sam Bording kala iaid shakhmat bad don katto katne ki kam kiba la dep ban ai pyntrei.“Ka Mission kala don ha ka lynti kaba dei. Ki kam kila sdang ban iaid bad ngi la buh ia ka nongrim treikam kaban pynthikna ia ka jingpyntreikam kaba iaid beit iaid ryntih” la ong u Mondal.

Kane ka Flagship Programme kadei kaba la khlieh hi da u Myntri Rangbah ka Jylla u Conrad K Sangma ka dei ka sienjam kaba khraw ban pynioh ia ka bording kaba khuid bad ka bording kaba long mar katjuh ha baroh kawei ka Jylla.“Ngi pynleit jingmut eh ha ki jaka ba ki jingpyniasoh lain bording ki long kiba eh namar ka jinglong ki jaka bad kiwei kiwei ki daw” u la ong. Ban pynthikna ia ka jingpyntreikam kaba khuid bad ba treikam bha, ka Sorkar kala thaw ia ki District Level Committee ba la khlieh da ki Deputy Commissioner bad kyrshan da ka kynhun na ki Block. Kine ki bor treikam kin btin lynti ha ka jingpyn dait ia ki kor bad pynthikna ba ka jingpyntreikam kan long kaba janai bad hapoh ka por kaba buh.

Ha ka sienjam ka ban pynkhlain ruh ia ka jingiashimbynta ki shnong ki thaw, ia kane ka mission yn pyntreikam ruh lyngba ka MGNREGA, kaba ailad ia ki nongioh bynta ba kin pyndait ia ki tiar solar hala ki jong ki shnong ki thaw.Ka Mission ka kynthup ruh ia kiba bun ki rukom treikam kata ka jingai subsidy ia ki Solar Hybrid Inverter kaba long naduh 500 VA sha ka 40 KVA na ka bynta ki longiing, ki jaka pule bad ki dukan, ka Net Metering ka ban ailad ia ki nongthang bording ba kin synniang sha ka grid bad pynduna ia ki bill bording, ka jingai ia ki Solar Water Heater ha ka dor kaba jem khnang ba kin ioh um khluit khlem da shaniah ha ka bording ilektrik.