Ki nongialam ka United Democratic Party (UDP) hynne ka sngi ka la ther tyngeh ia u nongialam bad MLA ka West Shillong constituency u Bah Paul Lyngdoh namar ka jingbuh dak jingkylli hakhmat u paidbah ia ka kam long nongialam hapoh ka party.
Haba kynthoh tyngeh, u General Secretary ka UDP u Bah Titosstarwell Chyne ula ong ba u Bah Paul ula kren ia ka kam nongialam ka party naduh ka jingbujli shuki Myntri Sorkar ba dang shen, bad ba um ju wan shuh sha ki jingialang ka party ban iakren ia kane ka kam hapoh Iing.
“Ha kaba nyngkong, Ngam lah ban sngewthuh balei ba u Bah Paul u lap miet ban buh jingkylli ia ka kam nongialam, kata ruh naduh ka sngi ba bujli ia ka shuki Myntri” la ong u Bah Titos.
“Lada u sngewkhia shisha halor kata, u la dei ban wan sha ki jingialang. Ngi la khot ia ka jingialang na ka por sha ka por, hynrei um ju wan. Tang ha ka jingialang CEC ba dang shu dep u la wan iashim bynta dei tang kane ka jingialang ba u wan mynta u snem. Kumta ngam lah ban sngewthuh balei ba u buh jingkylli ia ka kam nongialam” ula bynrap.
Haba pynthikna ka lah ban don ka jingbishar ban pynshitom ia ki MLA, u General Secretary ka UDP ula iathuh ba ka Disciplinary Committee ka Party bad ka State Parliamentary Board kin sa iashong jingialang shen ban shim ia ka rai.
“Hooid, kum ka party ngin sa lum ia ka jingialang ka Disciplinary Committee lane ka State Parliamentary Board, ngin sa shim ia ka rai halor kane” ula ong.
Haba kylli la kan don ka jingsospon ia kine ki MLA, ula ong “Ngam lah ban rai marwei. Kum ka Party, ngin sa shim ia ka rai”.
Ula bynrap “Ngam pat lah ban ong ia mynta. Lehse kan don shuwa ka jingai notice show cause hynrei ngam lah ban ong eiei ia mynta namar ka State Parliamentary Board kan sa shong jingialang bad rai” ong u Bah Titos haba pynshai ba kine ki 8 ngut ki MLA ki dang dei hi shibynta jong ka UDP.
“Baroh ki dang don bad ka party namar kim pat mih satia haduh mynta” ula ong.
Halor kaei ka daw ba orpait ka party, u Bah Titos ula ong ba ki don bun ki daw hynrei ula ong pat ba ka kam nongialam kam don bynta eiei satia.
“Ki don shibun kiei kiei hynrei ngam lah ban iathuh. Hynrei, kam don jingiadei eiei bad ka kam nongialam ka party” ula ong.
Haba kylli la kan dei ka jingmyntoi shimet ha ka sain pyrthei, ula ong “Ka dei ka jingjied ba shimet jong ki”.
You may also like
-
Kawang Petrol Bom ki runar ia ka ophis DMR, julor ka kali, hiar jurip u MR bad CS
-
Ngin rung BJP na bynta ka bha ka miat ki paidbah
-
Kyntait ki nongkyrshan NPP ia u Nelbi T Sangma kum u kyrtong, kynnoh ba leh ‘politik’ ki nongialam
-
17 tarik Risaw ka sngi khadduh ban pynrung kyrteng Electoral Roll, lah ban duh thep vote ki hajar ngut
-
Kiew kiba ioh pang AIDS ha Meghalaya kynthup 60 ngut ki longkmie armet