Mynjur ka sorkar ban pyntreikam 3 ki ain Runar ka sorkar India

Ka sorkar jylla hynne ka sngi ha ka jingialang jong ka kynhun Myntri sorkar, ka la mynjur ban pyntreikam ia lai tylli ki  Criminal Laws ne ka ain Runar jong ka sorkar India. Ia kane la pyntip da u nongaiktien ka sorkar jylla u bah Paul Lyngdoh ha ryngkat ka jingdonlang u Commissioner & Secretary ka tnad Kam Pohiing ka jylla u bah Cyril Lyngdoh hadien ba la wai ka jingialang jong ka kynhun Myntri sorkar ba long hynne ka sngi ha iingah u Myntri Rangbah ka jylla ha Polo, Shillong. Haba kren sha ki lad pathai khubor, u Commissioner & Secretary ka tnad Kam Pohiing ka jylla u bah Cyril. V Diengdoh, ula pyntip ba ka jylla Meghalaya kumba leh kiwei ki ri, ka la mynjur ban pyntreikam ia lai tylli ki Criminal Laws kynthup ka Bharatiya Nyaya Sanhita (BNS), Bharatiya Nagrik Suraksha Sanhita (BNSS) bad ka Bharatiya Sakshya Adhiniyam (BSA). “Ka sorkar ka la mynjur ban pyntriekam ia kine ki lai tylli ki ain runar katkum ba la buh da ka Ministry of Home Affairs ka sorkar India bad la mynjur da ka Meghalaya High Court,” ong u bah Cyril.

U bah Cyril ula ong ba ka sorkar hadien ba la iasyllok bad ka High Court, Meghalaya, ka la thaw ia lai tylli ki Rules thymmai kiba kynthup ka Meghalaya Esaksha Management Rules 2025, ka Meghalaya Electronic Processes Issuance Service and Execution Rules 2025 bad ka Meghalaya Guideline for Community Services Rules 2025. Ha ka Meghalaya Esaksha Management Rules 2025,  baroh ki sakhi kiba la lum da ka electronic format kum ki video, dur, yn thep ha ka mobile application kaba khot esaksha kaban pyniasoh da u code ba don 16 tylli ki number bad u hash tag ban pyniasnoh bad ka Crime and Criminal Tracking Network and Systems (CCTNS) bad  Inter-operable Criminal Justice System (ICJS). U Commissioner & Secretary ka tnad kam pohiing ka jylla u bah Cyril Diengdoh ula ong ba shisien ba la thep ia ki sakhi, yn sa shna ia u ID ban pyni ia ki sakhi ha ka jingbishar ka Kashari.

Ula ong ba ha ka dei Meghalaya Electronic Processes Issuance Service and Execution Rules 2025 kaba la shna katkum ka kyndon 64 jong ka BNSS ha kaba kiba shah khot hajir ban leit sha Kashari, ki lah ban pynmih da ka electronic format kaban khot kum ka e-summon procedure, khlem da donkam shuh ban phah da u briew ne da ki kot. Katba ha ka Meghalaya Guideline for Community Services Rules 2025, uno uno u briew uba leh kam sniew iba rit ba ria, bad haba shah rai pynrem ha ka Kashari, u shah dain kuna ne shah set along, un shah pynshitom da kaba shu phah pynkhuid ia ki hospital, pynbeit ia ki kot ha ki library, pynkhuid ia ki ophis, phah thung dieng, phah rep niut bad kiwei kiwei ki kam, ia kiba leh kam runar kiba rit baria khlem da donkam shuh ban shong ha phatok. Ula pyntip ba ka Kashari kan thung ia u Probation Officer uban peit ia kine kiba shah pynrem kin bud katkum ka jingbthah ka kashari.