Pynkhreh ka Balang Presbyterian Mynso B ïa ka Synod 2026

Ka Balang Presbyterian Mynso B, West Jaiñtia Hills District kum shi bynta ka jingpynkhreh ban pdiang iaka jingiaseng Synod Samla ka ban sa long ha u snem 2026 naduh ka 27 tarik haduh 1 tarik March 2026, hynne ka sngi kila pynpaw ka jingsngewnguh bad ai khublei ia u symbud myntri rangbah ka sorkar Jylla u Sñiawbhalang Dhar halor ka jingshimkhia jong u ban iarap pynbha pynmiat iaka madan ban pynlong jingiaseng.  Ia kane ka jingsngewnguh bad jingai khublei ka  Balang Presbyterian Mynso B kala pynpaw haka por ba ki dkhot committee ka balang ki hiar leit jurip ia kane ka madan bala dep pynbha pynwandur. Naka liang u H.Dhar Secretary Balang Mynsoo B, uba dei ruh u ryngbah balang u iathuh ba haka jingiaid lynti jongki ban pynkhreh iaka Synod Samla 2026 kila poi leit pan jingiarap shaduh sha u symbud myntri rangbah ka Jylla u Sñiawbhalang Dhar bad ma u ruh khlem kyrngah ula pynioh ki lad jingiarap.

Nalor kane ka madan u iathuh ba dang don shibun ki jingdonkam kum ki surok lynti syngkieng hapoh shnong (internal road) kiba la sniew shaba palat pud, u surok ban leit sha ïingmane, nangta ban shna pynbha iaka phyllaw ïingmane nalor kiwei de ki jingdonkam.”Kumba dei u briew ba shimkhia bad ba don ka mynsiem ban iarap lem ia kiba donkam jingiarap ngi kyrmen ba naka bynta kiwei pat ki jingdonkam jong ngi ruh un sa ai jingiarap shuh shuh” ong u H.Dhar Secretary Balang Mynsoo B.Ha kane ka sngi ka balang Mynsoo B ka pynpaw ruh ka jingsngewnguh iaka Kur Lyngdoh ba kila ai sngewbha ia kane ka jaka ban pynlong jingiaseng Synod.

Haba kylli pat lada don ne em ki jingiarap ba kila ioh na u MLA ka thaiñ u Commingone Ymbon,  u tymmen basan ryngbah ka balang u E.Syntem u iathuh ba haka jingleit pan jingiarap jongki na u, ula ai hi ka jingkyrmen ban peit iaki jingdonkam jong ki, kumta ma ki ruh ki don ka jingkyrmen ba un sa ai jingiarap halor ka jingpynkhreh jongki ban pdiang iaka Synod.Ha kane ka sngi naka liang ki dkhot committee ka  balang la donlang ruh u Tbn T.Myrchiang, Tbn P.S.Ryngkhlem, u bah O.War, bah M.Lyngdoh, R.W Lamin bad T.W Syntem.