Pynjlan ka sorkar sa 30 snem ban ai wai Orchid Polo bad Jiva Resort Sohra

U Myntri Rangbah ka jylla u Conrad Sangma ula pyntip ka sorkar ka la mynjur ban pynjlan sa 30 snem ban ai wai ia ka Polo Orchid bad ka Jiva Resort, Sohra, kata haduh 60 snem ha ka jingiateh ba thymmai.Ia kane la pyntip da u Myntri rangbah ka jylla u Conrad K Sangma hynne ka sngi hadien ka jingialang ka kynhun myntri hynne ka sngi. Haba kren sha ki lad pathai khubor u Conrad ula ong, ka sorkar jylla na kane ka jingaiwai kan ioh man u snem T.5 lak bad 4 percent na ka jingmih na ki nongpyniaid jong ka Polo Orchid bad Jiva Resort ha Sohra.“Mynta kin hap ban ai sa 4 percent na ka jingmih ba ki ioh lum ha ka shisnem sha ka Sorkar bad ha kajuh ka por kin hap ban ai ia ka bai wai ba T.5 lak man u snem,” u la bynrap.

Ula ong ba kane ka rai ka sorkar ka long shibynta ka ban iahap katkum ka kyndon ka tnad Kam jngohkai. U Myntri Rangbah ula pyntip ba mynshwa ka Orchid Polo bad ka Jiva Resort ki siew ia bai wai kaba T.2 lak bad T.2.48 lak man u snem.Kiwei pat ki rai ka sorkar ki long ban ai bor ban pyndonkam ia ka pisa da u Director of Prosecution, nangta ka la pynkylla ruh ia ka Service Rule Amendments (Administrative) jong ka Subordinate Treasury Accounts Service, Urban Affairs Service, Nursing Homes Licensing, Judicial Service, Higher Judicial Service, Police Telecommunication Service, bad ka Directory Establishment Ministerial Service.

Ka kynhun myntri ka la weng ruh ia ka Optional subject na ka MCS eksamin bad ka la wanrah thymmai da ka sobjek halor ka Meghalaya ba ia dei ia ka histori, kolshor, ka tip kunai bad kiwei. Ka la thung ruh ia u Lt. Col. Aibanjop Sooting (Retd.) kum u Zila Sainik Welfare Officer, Tura.