Pynkylla ka sorkar ia ka Meghalaya Excise Rules ban ai laisen ia ki shet kiad tynrai

U Myntri Rangbah ka jylla u Conrad K. Sangma hynne ka sngi ula pyntip ba ka sorkar ka la pynkylla ia ka Meghalaya Excise Rules da kaba bsuh ia ka kyndon ba thymmai ka 149 (A) ban ai laisen ia kiba shet kiad tynrai ne ki kiad pdem.  U Myntri rangbah ula ong, ba ka sorkar ka la mynjur ruh ban ithuh ia ka rukom shet kiad um tynrai da kaba shu pdem ne ka Fermented Country Liquor.Ula bynrap ka sorkar ka la mynjur tang ia ka rukom shet kiad tynrai ha kane ka jylla, katba ka jingshet kiad phareng ne distilled liquor kam kynthup ha kane ka ain jong ka sorkar.

“Ka jingpynkylla ia ka Meghalaya Excise Rules, ka long ban ai laisen ia ki briew ban pyniaid iew ia ki kiad tynrai ba shu pdem (Fermented liquor), ym ia ka jingshet kiad phareng ne distilled liquor,” la ong u Conrad bad bynrap ka jingai laisen ban shet ia ka kiad tynrai ka long shibynta ban kyntiew ia kiba sap ia ka rukom bam rukom dih tynrai bad ban pynioh ia ka kamai kajih.  Ula ong kane ka kiad ba ka sorkar ka ai license ka long kito kiba shet da u khaw ba khot u bitchi uba dei u khaw ba ju shet kiad ha Garo Hills, apong u khaw ba ju shet ha Arunachal Pradesh, u judima uba ju shet kiad ha Assam bad kiwei katkum ka rukom shet tynrai.

“Ha kane ka jylla ki Khasi-Garo ki don ka sap ban shet kiad katkum ka jingstad bad ka jingshem buit jong ki naduh mynshwa da kaba pyndonkam da u khaw,” la ong u Myntri Rangbah.