La donkam ban pyniar ia ka Mendipathar Station Rel sha kiwei ki bynta ka rilum Garo

U MLA Mendipathar constituency u Marthon Sangma, u la pynpaw ia ka jingdonkam kyrkieh ban pyniar ia ka Station Rel kaba don ha Mendipathar North Garo Hills sha kiwei pat ki bynta jong ka thain Garo Hills.Ia kane u MLA ka Mendipathar ula ong haba kam ruh ba wat hapdeng ki bun snem baka Station Rel Mendipathar la shakri, hynrei haduh mynta ka thain kam shah ktah naka jingwan buhai shnong beain ki bar Jylla.Kane ka jingkren jong u MLA Mendipathar constituency u Marthon Sangma ka wan hapdeng ki jingïakren ba thymmai halor ki jingtei lynti Rel ha Meghalaya, ha kaba ka jingpynïasoh ka la long ka mat kaba la buh jingeh ha ka saiñ pyrthei namar ka jingsngewkhia halor ka jingwan buhai shnong bad ka hok halor ka khyndew ka shyiap.

Haba pynksan ia ka jingkylla ha ka ioh ka kot kaba la wanrah da ka jingpyniasoh lynti Rel, u Marthon u la ong, “Mynta ki briew jong nga ki lah ban wanrah ia ki mar rep jong ki na Mendipathar sha Guwahati ha ka dor kaba duna bha. Mynta ka jingpynheh bad pyniar ia ka Station Rel na Mendipathar sha kiwei pat ki bynta jong ka Garo Hills ka long kaba donkam”.Haba pynpaw ka jingsngewkhia halor ka jingwan buhai shnong beain ki bar Jylla, u MLA ka Mendipathar u la kyntait ïa ki jingtieng ba la pynpaw da ki kynhun sengbhalang na rilum Khasi-Jaiñtia Hills, da kaba pynskhem ba ki ain bad ki jingïada lyngba ka riti synshar ka ri India iaka ka Meghalaya ki dang khlaiñ. “Ha Meghalaya, ngi don ka lad ban tehlakam ïa ka jingwan rung ki briew. Ka Meghalaya hapoh ka khyrnit ba hynnriew. Ha Meghalaya ym lah ban die jaka sha kiwei pat khamtam sha ki bym dei ki riewlum” ula ong.

U MLA ula pynpaw ba ka jingïakren ka dang ïaid shakhmat bad ka Ministry of Railways ka Sorkar Pdeng ban pyniair iaka Mendipathar Railway Station shabar jong ka Guwahati. “Ka sorkar ka dang ïakren bad ka Ministry khnang ba ym tang ha Guwahati hynrei ka jingpynïasoh rel kan poi shaduh Kolkata ne Delhi bad kiwei kiwei ki jaka bad kane kan kham myntoi ïa ki paidbah nongshong shnong khamtam na Garo Hills. ka projek kan urlong na ka bynta ka jingmyntoi jong ka thain” ula ong.