U Bah Sanbor Shullai na BJP, Methodius Dkhar na HSPDP

Ka sorkar synrop Meghalaya Democratic Alliance (MDA) ba ialam da ka National Peoples Party (NPP) hapoh ka jingialam u Myntri Rangbah u Conrad K Sangma ka la pynkhreh ban bujli noh ia ki Myntri Sorkar ha u Nailur mynta u snem. Katkum ki khubor ba la ioh na ki nongialam ki seng saiñ pyrthei bapher bapher ba donlang ha ka sorkar MDA, ki la pynpaw ba u Myntri Rangbah ka jylla u Conrad K Sangma un sa bujli noh ia ki myntri sorkar bad kin don katto katne ngut ki myntri ba mynta ban sa shah pynhiar shuki myntri bad ban kyntiew kyrdan myntri da kiwei pat MLA ha jaka jong ki. Ki nongialam na ki seng saiñ pyrthei ki la ong, “Ia mynta ngim tip, katno ngut kin shah pynduh noh ia ka jinglong myntri bad kane baroh kan shong ha ka jingstad jong u Myntri Rangbah ka jylla ba un leh ia kaba donkam khamtam ban bate kam thymmai ruh ia ki myntri sorkar”.

Halor ka jingkylli lano u Myntri Rangbah yn bujli ia ki myntri sorkar, kine ki nongialam ki la pynpaw ba kim tip thikna ia ka tarik hynrei ki la pynpaw ba kane ka kam kan sa urlong noh ha u bnai ban wan (Nailur).Lah ban ong, ha u bnai ban wan kan sa sdang ka Dorbar Synrai jong ka ïingdorbar thawaiñ ka jylla ka ban sdang naduh ka 8 haduh ka 12 tarik u Nailur 2025 bad kumta la khmih lynti ba u Myntri Rangbah ka jylla un sa bujli ia ki myntri sorkar ynda la dep ia ka dorbar synrai ne ‘Autumn Session’ syndon. Kumba ka paw, ka BJP ka don ia jingthmu ban phah noh da u Bah Sanbor Shullai ban shimti ia ka kam Myntri ha ka jaka jong u Bah AL Hek, katba ka HSPDP ka da u Bah Methodius Dkhar ban shim ia ka kam myntri ha ka jaka u Bah Shakliar Warjri. La iathuh ba ka NPP ruh ka don ia ka jingthmu ban thung bujli ia ki myntri sorkar hynrei haduh mynta kam shym la paw katno ngut ki ban shah pynhiar shuki myntri bad mano ban ioh long myntri thymmai napoh rilum Khasi bad Garo.

Nalor kane, ka la don ruh ka jingiakren ha ka seng UDP na ka bynta ban bujli noh ia ki myntri, hynrei ym pat lah ban ioh ia ka jingtip, la ki ar ngut ki myntri sorkar na ka UDP kynthup ia u Bah Paul Lyngdoh bad u Bah Kyrmen Shylla kin dang bteng ban long kum ki myntri ne yn bujli noh da kiwei. Haba kylli, ba ki la don ki MLA na ka seng Congress bad PDF kiba la leit pyniasoh noh sha ka NPP bad hato ka sorkar MDA ka don jingthmu ban thung myntri sorkar, ki nongialam na ki seng saiñ pyrthei ki la iathuh ba kam shim la don kano kano ka jingbuh kyndon ha ka jingwan pyniasoh jong ki sha ka seng NPP bad kumta kan long kaba eh ba kin ioh shuki myntri hynrei ka shong ha ka jingstad jong u Myntri Rangbah ka jylla.