Hadien aiom lyiur, yn pynitynnad ia ka Khyndai Lad

U Myntri ka tnat Tourism u Bah Paul Lyngdoh hynne ka sngi u la ong ba ka Khyndai Lad kan sa don ia ka dur kaba thymmai pura hadien ba la dep ban pynbha bad pynitynnad ia ka. Haba kren shaki lad pathai khubor u Bah Paul u la pynpaw ba ka Sorkar kala thmu ban wanrah ka jingkylla kaba heh bha iaka Khyndai Lad bad la dep ruh ban mang pisa.”Ngi khmih lynti ia ka por hadien ka jingkut noh ka aiom lyiur ha kaba ngin sa lah shisha ban sdang ia ki kam ha Khyndai Lad bad phin sa iohi ia ka dur kaba thymmai pura ka Khyndailad” la ong u Bah Paul.

U Bah Paul ula ong kane ka jaka kan don ïa ki jingitynnad kiba bha tam, ki jintem, ki jingpynitynnad daki Light, ki jaka shongkai kiba iahap bad ka leit ka wan ki nongleit nongwan hapoh Khyndai lad. U Myntri u la ong ba ki nongkhaii ha katei ka thain ki la ioh jingmyntoi na ka jingpynkynriah ia ki nongdie jingdie madan sha ki jaka ba la ithuh kyrpang daka Sorkar.

Ula ong ba ka jingpynkynriah iaki nongdie jingdie madan ka la khanglad ia ki nongdie madan ban rung sha ki jaka treikam bad u khmih lynti ia ka jingiatreilang jong ki trai dukan bad ki nongshong shnong ha katei ka thain. U la pynthikna ban shim khia bad ka Shillong Municipal Board (SMB) halor ki mat kiba thymmai kiba la mih dangshen khamtam iaka jingkynnoh ba don kiba iaid kali wat haka por bym shah ban iaid kali.