Lada pynsangeh kali Tourist bar Jylla, ka Assam ruh kan khang ha Khanapara:Paul

U Myntri ka tnat Tourism u Bah Paul Lyngdoh ula ong ba ka Sorkar kan hap pyrkhat sani bha bad kano kano ka rai baka shim kam dei pat ban ktah ïa ka rai jong kano kano ka Sorkar Jylla ba marjan. Ïa kane u Bah Paul ula kren haba jubab iaka jingdawa ka All Khasi Meghalaya Tourist Taxi Association (AKMTTA) baka Sorkar ka dei ban ithuh iaki jaka ban pynsangeh iaki kali Tourist bar Jylla khnang ban nym shah iaki ban kit iaki nongwan shangkai pyrthei sha ki jaka jngohkai kiba don hapoh Meghalaya.

Haba kren shaki lad pathai khubor u Bah Paul ula ong ba lada ka Sorkar Meghalaya ka pynsangeh iaki kali bar Jylla ban leit sha kiwei pat ki jaka jong ka Jylla, kane ka sienjam ruh ka lah ruh ban long ïa ki kali trai Jylla lada ki leit sha Assam ne sha kiwei pat ki Jylla ka ri India.“Lada ka Sorkar Jylla ka pyndem haka AMKTTA, nga tharai ki kali Meghalaya ruh kin shah pynsangeh tang ha Khanapara lada ki leit donkam sha Assam bad kane kan pynmih ki kyrum kynram” la ong u Bah Paul. U Bah Paul ula ïathuh ba ka Sorkar kala ioh pdiang iaka jingdawa ka AKMTTA namar kata la thaw ruh iaka Committee bala khmih da u Commissioner Secretary ka tnat Tourism u Bah CVD Diengdoh ban ïakren bad phylliew jingmut bad ka Association.

Ula ong ba ka ka Jylla kaba marjan tam bad ka Meghalaya kadei ka Assam kaba don ka Airport bad ka Railway Station ba heh tam, ki jaka sumar bad ki jaka pule. “Ngi hap phikir bha khnang ba kano kano ka rai baka Sorkar Jylla ka shim kam dei ban pynjynjar kylla iaki briew jong ngi kiba donkam leit sha Assam” ula ong.