Plie u Conrad ia ka kamra ba 50 thymmai ba jingthiah ha DMCH Tura.

U Myntri Rangbah ka jylla u Conrad K Sangma hynne ka sngi ula plie paidbah ia ka Annex Building ba dang dep shna thymmai ba don 50 jingthiah hapoh ka District Maternity & Child Hospital (DMCH), Tura.

Haba kren ha ka jingialang, u Myntri Rangbah ula ai khublei ia ka Tnad ka Koit ka Khiah bad ban jur ba ka jingiada ia ka jingim ka dei ka jingkitkhlieh lang jong baroh bad ula iathuh ba naduh u snem 2018, ka Sorkar ka la buh hakhmat eh sha ka kam shakri ia ka imlang sahlang, naduh ka koit ka khiah, ka pule puthi bad ka bha ka miat ka imlang sahlang kaba kot ia shibynta na ka saw bynta jong ka mang tyngka ka Jylla.

Ula banjur ia ka jingkongsan ban pyndonkam bha ia ki jingdon jingem, haba pynpaw ba ka roi ka par kam dei eh tang halor ka jingpynlut ia ka pisa hynrei ban pynthikna ba ki jingpynlut kin ai ia ki jingmih kiba lah ban thew. Haba shim ia ka koit ka khiah bad ka pule puthi kum ka mat kaba bun jyrwit jyrwat bha, ula ong ba ka jingkynshew ha kine ki kam ka ju shimpor hapdeng san haduh shiphew snem ban iohi ia u soh.

U Conrad ula ong ba ka Meghalaya kala iohi ia ka jinghiar kaba bun eh ha ka jingiap ki Kmie kiba punkhun hapoh ka Ri, kaba kot haduh 55% ka jinghiar bad ka banjur ba ka thong kaba khatduh hi ka dei ban long 0 (nod) ka jingiap ki Kmie bad ki Khunlung. Ula pynpaw ba ka Mother & Child Health Model ka Jylla kala ioh ia ka jingithuh hapoh ka ri bad pyntip ba ula shah khot ban ai ka jingbatai ia kane ka rukom treikam hakhmat u Myntri Rangbah Duh ka ri, kaba long ka khyllipmat kaba sngewsarong ia ka Jylla.

Ula bynrap ba ki dang don bun ki project ka koit ka khiah kiba dang pynkhreh mynta hapoh ka PM-DevINE Scheme nalor ka jingthmu ban nang pynheh ia ka Mother & Child Hospital.

Ha kane ka prokram la wan iashimbynta lang u Sampath Kumar, IAS, Additional Chief Secretary ka Sorkar Jylla, u Vibhor Aggarwal u Deputy Commissioner ka West Garo Hills, Dr. P. Chyne, Director of Health Services (MCH & FW), ki Heh Ophisar ka Tnad ka Koit ka Khiah, ki Doktor bad kiwei kiwei.

Kane ka jingtei ba thymmai la khmih lynti ba kan nang pynkhlain ia ka jinglah ban ai ia ka jingsumar kaba kham bha ia ki Kmie bad ki Khunlung hapoh ka hospital bad kan pynduna ia ka jingkhap ngiah ha ka jingdon ki nongpang bad ban pynthikna ia ki lad ai jingsumar ba kham bha.

U Myntri Rangbah ula pyllait bad sam ruh ia ki Mother & Child Care Kits sha ki nongioh bynta kiba shah sumar hapoh ka hospital.