Markhmat bad ki paidbah iamir jingmut u Myntri halor ka skhim MHIS bad PMJAY

U myntri ka tnat jong ka koit ka khiah ka sorkar Jylla u Wailadmiki Shylla mynta ka sngi ula shim bynta ban iakren iamir jingmut bad ki paidbah haba ia dei bad ka skhim MHIS & PMJAY ne ka skhim ba ka sorkar ka ai jingiarap kyrpang iaki paidbah ka Jylla ha ka pang ka shitom ki bym dei ki nongtrei sorkar, ba na kane ka jingiamir un sngewthuh iaki jingmyntoi ba ki ioh kumjuh ruh lada don kino kino ki jingeh ba ki mad.
Ia kane ka jingiamir jingmut, u myntri ula sdang shwa na ka constituency lajong ka Jowai constituency ha ka jingialang ba la pynlong da ka ophis District Medical and Health Officer, West Jaintia Hills ha Community Hall ka Lumpyrdi Mihmyntdu ryngkat ka jingdonlang ka CEO MHIS kong Evarinia Liza Warjri, ka Lisana Balsime R. Marak, MCS Assistance commissioner WJH, ka Dr. P.Shylla DM&HO WJH bad kiwei nalor ki paidbah ba bun.
Bad ka jingshim ka tnat ka koit ka khiah ia kane ka sienjam dei namar ba ki kwah ba u paidbah un shai bad tip iaka rukom pyntreikam ia kane ka skhim la haba iadei bad ki hospital, ne ka rukom ot pisa ioh jingiarap bad kiwei, lyngba ka jingiashim bynta iamir jingmut bad jingpynshai pynsngewthuh.
Haba pynshai ia kane ka skhim naka liang u myntri u iathuh baka 5lak tam bala mang shisnem naka bynta kawei ka longïing ka kynthup la kajong kajong ka song pisa naka bynta la ki jong ki jait jingpang bapher bapher.
Haba iadei bad ki hospital u myntri u ong don ki hospital ba pyntreikam MHIS don pat ki bym pyntrei, nalor ba don ruh kiba pdiang tang katkum ki jait jingpang.
Ki rukom ot bai sumar ki shong naki jait jingpang bad ka sorkar lyngba ka MHIS ruh kala buh la ka jong ka dor ba dei ban ot.
Naka bynta ki jingpang ba kham jur bad heh jinglut u iathuh ba lada kane ka 5 lak kan lut tang hapoh ki 8 bnai ei ei khlem pat kut snem, lah ban buh aplication sha ka MHIS na ka bynta ban ioh shuh ki jingiarap lyngba ka CM care plus ba la sdang da u myntri ryngbah ka Jylla.
U myntri u ong ruh ba kaba kum kane ka jingpynshai ka long donkam bha iaki paidbah ban sngewthuh khnang ba kino kino ki hospital ba mut leh thok ruh kin ym iohlad.
Ha kajuh ka por u kyntu iaki paidbah ban shim kabu ia kane ka skhim da kaba leit shondur ym ban ap haduh ban da pang, namar ka jingiarap ba 5lak tam kam dei shuh kaba kai bad ym don ruh ba lah ban ai ei haduh kat kane.
Ha kane ka sngi ki paidbah kila iashim bynta ban pynsngew iaki jingmyntoi ba ki ioh bad ruh ban pan jingshai halor ki bynta ba kim shai, ia kaba la ieng ban ai jingpynshai da u myntri ka koit ka khiah hi lem bad ka kynhun napoh MHIS.