Ki nongmhkhmat mynta ki pyrkhat tang ïa ka ‘Next Election’ ym ïa ka ‘Next Generation

Ki Kynhun sengbhalang bapher bapher hynne ka sngi ki la kynmaw burom ia ka sngi iap ba 163 jong u Woh Kiang Nangbah da kaba pyllong ia ka jingsngap jar kaba ar minit bad buh syntiew ha u motdur  ba shi rynieng ba ieng hajan Shillong Civil Hospital. Ha kane ka sngi la ioh sngew ia ka jingkren na ki nongialam sengbhalang bapher bapher kynthup ka Khasi Students Union, Hynniewtrep Integrated Territorial Organisation (HITO), Federation of Khasi Jaintia & Garo People (FKJGP), NortEast Students Union (NESO).Haba kren ha kane ka sngi, unongialam ka FKJGP u  Bah Dundee Khongsit ula pynkynmaw ba u Kiang Nangbah u la mih shakhmat ban iakhun pyrshah ia ki dohlieh kiba la wan thombor ia ka jaidbynriew.Ula ong ba ha ki snem mynshwa ka jaidbynriew ka la sei ia ki riewkhraw ban iakhun ia ki dohlieh bad mynta ka jaidbynriew ka donkam ban sei ia ki samla kiba don ia ka.mynsiem kum u Woh Kiang nangbah.”Ngi donkam ban sei ia ki samla kiba don ha ka jingnang jingstad bad kum ka jaidbynriew ngi lah ban pynmih biang sa shisien ki riewshlur ki riewstad kiba lah ban synshar ia kane ka ri,” ong u bah Dundee.

Halor ka jinglong jingman ka jingshah byrngem  ka thain Lammihgi na ki kynhun shimet na Bangladesh, ula ong ba kim lah ban shim sting namarkata donkam ban iada ha shwa ba ka umsaw kan wan ban tyllep ia ka jylla bad ula pynpaw ka jingsngewsih ba ka jingdawa ban ioh ia ka ILP, haduh mynta ka sorkar India ka leh kuman leh mutlop.Ula ther ruh ia ki dalal kiba kwah ban wanrah  lynti rel ha ri Jaintia da kaba kynthoh ba kadei  tang ka jingiohnong jong ki riew shimet kiba kwah ban shim kabu bad na ka liang ka seng kan nym ailad ia kine ki dalal ban wanrah ia ka lynti rel katba ym pat ioh ia ki lad jingiada.Katba na ka liang u nongialam ka NESO u bah Samuel Jyrwa, ula pynkynmaw ia ki kam ba radbah jong  u kiang nangbah ha kaba ula mih ban ialeh pyrshah ia ka sorkar phareng halor ki jingpyrshang ban iuhroit ia ka hok ka riti jong ka jaidbynriew ba kyrpang.Ula ong ba ha ki snem ba la leit ka sorkar India ka la pyrshang ban pyllong ia ki riewkhraw ka ri u Woh Kiang Nangbah, u Syiem Tirot SIng ban long ki nongialeh lailuid ka ri India, hynrei ia ki mat ki jura  ka jaidbynriew kum ka ILP, ka jingpynrung ia ka ktien khasi ha ka khyrnit ba phra ka leh matlah sah.” Ka jaidbynriew haduh mynta ka dang hap ban iakhih  iaskar ban dawa ia kine ki hok,” ula ong.

U bah Samuel ula ong ba ka jylla ka don ia la u pud u sam bad donkam ban pyntikna ban long kynrad ha la ka jong ka ri bad ban bat ia la ka jong ka khaii ka pateng, ka khyndew ka shyiap bad ka synshar khaddar.Na ka liang u Nongialam ka KSU u bah Lambokstar Marngar ula ong ba ka sorkar jylla tang ia uwei u briew, ka la set byndi ia u Tirot Sing bad ka la sdien phasi ia u Woh Kiang Nangbah, hynrei ka jingtieng ha kine ki sngi ka long ba ki mynder ri bad ki nongdie ri ki mut ban sdien phasi ia ka jaidbynriew baroh kawei.Ki paidbah ki la dawa ia ki ain ki kanun kum ka ILP na ka sorkar India, hynrei sngewsih ba na jaka kane la wanrah pynban ia ki ain ki bym iadei dur bad ka rukom pyrkhat pyrdain bad ka jingshong shngain ka jylla bad la wanrah pynban ia ka Citizenship Amendment Bill kaba la kylla ain mynta ka CAA.Ula ther ruh ia ki nongmihkhmat ka jylla kiba pyrkhat tang ia ka 5 snem, ym ia ka bha ka miat ki paidbah ka pateng ban wan bad ki shu lapmiet ban leit shna drama ym ban shna polisi.” Ki nongmihkhmat mynta ki pyrkhat tang ia ka ‘Next Election’ ym ia ka ‘Next Generation’ ne ka ilekshon ban wan ym ia ka pateng ban wan,” ong u bah Lambokstar.U President ka HITO u bah Donbok Dkhar ula kyntu ia ka jaidbynriew ban don ia ka jingiatylli ban iakhun ia ki mat jong ka jaidbynriew. Ula ong ba kaba sngewthamula ka long ba mynta ki mynder naduh na Bangladesh ki kren bein bad ki la byrngem ba kin wanrung tuh, hynrei ka sorkar jylla haduh mynta kam shym la ai ia ka jylla ia ka ain ban iada ia ka jaidbynriew.