Ha ka rakhe dap 50 snem plie u MLA ïa ka ïing skul ba T.37 lak

Ka Ialong Mulang Pohshnong Govt LP School kaba la sdang naduh u snem 1975 mynta ka sngi ka la lehkmen iaka jingdap 50 snem ka jingiaid lynti jong ka ban ai jingshakri iaki khynnah skul lyngba ka jingnang jingstad haka jingdon bynta lang naduh ki nongialam  ka dorbar shnong Ialong pyllun, ki nongialam ka dong Ialong Mulang, ki dkhot SMC, ki nonghikai ki khynnah skul nalor kiba shah khot sngewbha ha kaba u myntri ka tnat jong ka koit ka khiah bad tnat sports u Wailadmiki Shylla ula long kum u kongsan, ka Dr.Wa-i-sa Sumer District School Education Officer WJH kum ka symbud kongsan.Ia kane ka skul la sdang nyngkong na i iing Club ka dong Ialong Mulang, nangta daka  jingstad jingshemphang ki nongialam ka dorbar shnong Ialong pyllun kumjuh ka dong Mulang la lah ban pynieng iaka skul building jong ka hi, nangta la nang pynheh daka jingioh iarap naka skhim MDC lyngba u Shemhok Garod 5 lak, naka central skhim PMAAGY 20 lak bad  na ka MLA skhim ba 37 lak tyngka lyngba u Wailadmiki Shylla.

Ia ka skul building thymmai ba  37 lak lyngba u  Wailadmiki Shylla la plie hi mynta ka sngi.Halor ka jingiaid lynti kane ka skul naka bynta ban ai jingnang jingstad, kumjuh ruh ban  wanrah ki jingtei jingshna la pynsngew daka Headmistress ka D.Paswet kumjuh ruh ki riew ryngbah ka shnong kiba la ia peit pyniaid lang, bad ki khynnah skul ba juh pule ha kane ka skul, kynthup  u Waheh shnong Ialong pyllun u T.Ram Phawa, u P.Shylla Ex Chairman dong Mulang, u P.Pale bad kiwei.Ka symbud kongsan Dr.Wa-i-sa Sumer haba iaroh iaka jingiaid lynti kane ka skul bad ruh jinglong jingman jongka skul building, kala pynkynmaw ruh shaki nonghikai iaka  kyntien Teacher da kaba ong ba dei ka kyntien bakhia bha namar haki don ka jingshaniah ki khynnah skul bad ki kmie ki kpa, ki hap  mad bun ki jingeh, ki dei ban trei iaka kam daka  mynsiem kitkhlieh kumno ban pynwandur iaka jingim ki khynnah ym ban shu pyndep kamram, ki nonghikai dei ban long kiba koit ba khiah ha kaba nalor ka jingai jinghikai kin pyni ruh shaki khynnah iaka jingkordor ka koit khiah bad khuid suba, ki nonghikai ki dei ban sngewthuh iaki khynnah bad long kiba   iaishah.

Ha kajuh ka por ka kyntu ruh iaki khynnah skul ban long kiba minot haka jingpule khnang ban tyngshaiñ ka lawei.Naka liang u kongsan Wailadmiki Shylla u kwah ba ynda poi kane ka skul  100 snem, ka building ruh kan nangheh nangiar shuh shuh, ki nonghikai ruh kin nangbun  kumjuh ki khynnah skul ba pule haka.U kyntu ban pynneh iaka jingkhuid ban kheiñ kor iaka skul kum ka jaka kyntang ym ban leh dusmon da kaba ong ba dei  ka skul sorkar, hynrei dei ban kynmaw ba kano kano ba wanrah ka sorkar dei ka jong ngi hi ban ia ioh myntoilang. “Kum u MLA haki 7, 8 snem nga la pyrshang ban  lehbha ban wanrah bun ka roi ka par hapoh ka constituency kynthup ruh ki skhim shimet, hynrei watla katta ruh dang don ki bym pat kot lut baroh manar ym lah ban leh  shisien leh, kumta donkam iaki paidbah ban long kiba iaishah naba yn dang wanrah shuh shuh iaka  roi ka par “. Ong u Wailadmiki Shylla.Da kaba bynrap ruh ba wat  da u MLA ba ioh ban trei haduh 15, 20 snem ruh kam dei kaba suk ia u  ban wanrah ka roi ka par kumba  la  wanrah ma u hapoh kine ki 7, 8 snem.Ha kane ka sngi u Wailadmiki ula kular ruh ban pyrshang pynbit pynbiang iaki jingdawa kane  ka skul  naduh ban siang iaka madan bad kiwei ki jingdawa bala pynsngew ha u mynta ka sngi.