Ki samla ki lawei ka thain ki dei ban iatreilang ban kyntiew ia ka imlang sahlang: Lahkmen

U Myntri ka tnat Pule Puthi ka Jylla, u bah Lahkmen Rymbui ula leit ban shim bynta ha ka jingïalang pynkup burom ia ki samla pule jong ka 8th North East Graduate Congress 2026, kaba la long ha University of Science and Technology Meghalaya, ha kaba u myntri ka tnad jngohkai pyrthei u Timothy D. Shira; Myntri C&RD bah Sosthenes Sohtun, u MLA ka Nongpoh, bah Mayralborn Syiem, Vice Chancellor ka USTM bad ki samla pule na kylleng ka thain shatei lammihngi.

Ka 8th North East Graduate Congress 2026 ka dei ka jingïalang ba lai sngi ia ki samla pule puthi ba la pynlong da ka University of Science and Technology Meghalaya. Ka Congress ka thmu ban pynïasoh lang ïa ki samla ba dang pule ha ka kyrdan pule na kylleng ka thaiñ shatei lammihngi ka ri India ban pynroi ïa ki sap bad pynkhlain ka jingïatylli ha ka thaiñ bad kyntiew ïa ka jinglong nongïalam da ka ïakynduh bad ki riew shemphang ha ka pule puthi bad ki kam karkhana.

Ha kane ka sngi la pynlong ïa ki jingïakop bapher kynthup ka thoh ka tar, kolshor, ki jingïalehkai bad ka jingpynwan dur thymmai.

Haba ai jingkren ha ka jingialang u Myntri ka tnad pule puthi, u bah Lahkmen Rymbui ula ong, ia ka jingdonkam kum kine ki rynsan na bynta ban kyntiew ia ka roi ka par ki samla pule. U la ban jur ba ki jingïalang kum ka Graduate Congress ki don ka bynta kaba kongsan ban sam bad pynroi ïa ki jingmut jingpyrkhat ki samla bad ban ai lad ïa ki samla pule ban pyni ïa ki sap jong ki.

U Myntri ula kdew ka jingiakynduh ba ar ssngi ka Congress, kan pynleit jingmut ha ki jingpyni ia ka kolshor, ka long kaba kongsan bha namar ka rakhe ia ka jingriew spah ka kolshor bad ki rukom tynrai ka thain shatei lammihngi.

Ula ong kum kine ki jingthmu ym tang ban pynneh ïa ki pateng bynriew hynrei ki kyntiew ruh ïa ka jingburom markylliang, ka jingïatylli hapdeng ki jaitbynriew bapher bapher.

Haba ai mynsiem ïa ki samla pule u Myntri ula kyntu ïa ki ban ïashim bynta shitrhem ha kum kine ki prokram kiba long ki rynsan ban ïarap iwei ia iwei, kumno ban long nongïalam bad ïatylli kawei. Ula kynthoh ki samla ki long ka lawei ka thain bad ki dei ban shim ka kabu ban iatreilang bad ban noh synniang na bynta ka jingbha ka imlang sahlang.

U Myntri ula ïaroh ïa ka University of Science and Technology Meghalaya bad ki paralok ba la pynlong ïa ka jingialang kaba jop bad pynpaw ka jingkyrmen ba kum kine ki jingthmu kin ïai bteng man la u snem.

U la ïakren bad ki samla pule na ki tnad bapher bapher ka USTM bad ai khublei ïa ka jingstad bad pynwandur ia ki sap pynroi lyngba ki jingpule jong ki. U Myntri ula sakhi da lade ia ka sap bad ka jingtbit ki samla pule.

Ka jingïalang ki samla pule ba 8 jong ka thaiñ shatei lammihngi 2026 ka ïai bteng ban long kum ka rynsan ba kongsan ban pynkup bor ïa ki samla, ban kyntiew ïa ka mynsiem ka jingïatylli ha ka thaiñ shatei lammihngi.