Sdang ka jingkem ksew surok ha Jowai ban ai Injection Rabies

Kum shibynta ka World Rabies Day ne ka jingiakhun ban iada naka jingpang rabies kaba dei kawei naki jait jingpang ba ma bha bad ba lah ban lam shaka jingiap ki briew lada shah dait shah trut haki mrad ba don ia kane ka jingpang, mynta ka sngi naka liang ka tnat jongka koit ka khiah West Jaiñtia Hills District ryngkat ka jingiatreilang ki bor district West Jaiñtia Hills, ka tnat veterinary west Jaiñtia bad ka Just be friendly (JBF) Trust mission rabies kila pynlong iaka jingpynsngewthuh paidbah halor kane ka jait jingpang bad sdang ruh ka jingleit kem iaki ksew surok haki jaka bapher bapher ka sor Jowai naka bynta ban ai injection iaki kum ka lad ban iada iaki na ka jingpang rabies.

Bad kane ka jingleit kem ksew surok ha Jowai naka bynta ban ai injection kan neh lai sngi lynter kata haduh ka 30 tarik mynta u bnai.

Ha ka jingialang ba pyniaid daka Dr. P Shylla, District Medical and Health Officer, West Jaintia Hills, ha conference hall DMHO, shwa ban sdang ka jingleit ai injection u

Dr. Bahiam Kupar C Nongrum, District Surveillance Officer (IDSP) & District Nodal Officer, NRCP, u ong ba iaka jingpang rabies lah ban iada tang lada sumar ia ka koit ka khiah jong ki mrad bad ka koit ka khiah ki briew.

Ula pynsngew ruh halor ka jingdonkam ban ai injection iaki ksew khamtam ban don ka jingkitkhlieh naki trai ba ri, da kaba ong ruh ba lada 70% naka jingdon ki ksew ha kano kano ka jaka lah ban ai injection kala iarap shibun ia u briew ban lait na kane ka jingpang rabies.

U Dr. Nongrum ula kyntu ruh iaki paidbah ba lada shah dait ne shah trut haki mrad ba ri ha ïing ne kiba sha surok dei ban sait daka sabon bad theh daka um kumba 15 minit nalor ban shimkhia leit ruh mar mar shaki jaka ai jingsumar ba jan tam, ha kajuh ka por ban pyndep ruh iaka jingleit ai injection katkum ka por bala bthah ban pyndep.

Ka Dr. R. Bamon naka tnat veterinary haba kren kala pynsngew iaka kamram jongki naka bynta ban ai jingshakri iaki mrad ha kylleng ka district, bad kala pyntip ruh ba ki don iaka veterinary hospital kumjuh 15 tylli ki veterinary dispensaries kiba peit iaki ksew, ki miaw kumjuh kiwei pat ki jait jingri bapher.

Ka ong ba ki juh pynlong iaka jingai injection naka bynta ki mrad ha kaba ha u snem 2025-2026 kumba 2500 tylli ki mrad la lah ban ai injection.

Ha kajuh ka por ka kyntu iaki paidbah khamtam ki trai ba ri jingri bad ri ksew miaw bad kiwei ba kin iatreilang bad ka tnat Veterinary da ka ban leit ai injection barabor iaki mrad bad jingri jongki shaka tnat veterinary.

Nangta ban pyntip ruh kloi kloi shaki bor ba dei khmih lada don ka jingsuba ioh pang rabies lyngba ka jingiadait ki ksew surok khnang ba ka jinglah ban shim iaka sienjam haka por ba kloi kan iarap ai jingiada naduh ka jingim briew bad jingim ki mrad kumjuh.

Na ka liang u Dr Shishankar, JBF Trust, (Mission Rabies) ula banjur halor ka jingdonkam ban khlaiñ ka jingiatreilang hapdeng ka tnat jong ka koit ka khiah bad ka tnat Veterinary kumjuh ki bor district, ki bor shnong, ki kynhun seng bad ka imlang sahlang khnang ban lah iada bad pynduh pyndam ia kane ka jingpang rabies.

Ula bynrap ruh halor ka jingdonkam ka jingpynsngewthuh paidbah bad ka jingiashim bynta lang haka imlang sahlang ban pynkhlaiñ ki lad ai jingiada bad rat dyngkhong ia kane ka jingpang hapoh ka West Jaintia Hills.