Ai burom ia u shipai ba la shongthait bad kaitor ba pawnam

U Myntri Rangbah ka jylla Meghalaya u Conrad K Sangma lem bad u Myntri ba dei khmih ia ka tnad Community and Rural Development (C&RD) u AT Mondal, mynta ka sngi ki la hiar sha Ri Bhoi District ban plie paidbah ia ki ar tylli ki ophis building ba la tei thymmai na bynta ka Bhoirymbong C&RD Block bad ka Umling C&RD Block. Ha ka jingplie paidbah ia ka Bhoirymbong C&RD Block la ai burom ban plie paidbah da u Bah Colbert Shadap, u shipai ba la shongthait uba la don ka bynta ba khraw ha ka jingiakhun ia ka thma Indo-Pakistan ha u snem 1965 bad 1971, ha kaba la pyndon burom ruh da ki jingai sngewbha ba la pynkhamti da u Myntri Rangbah ka jylla. Ha kane ka sngi ba la plie ia ka building ha Lumdaitkhla, Bhoirymbong la iadonlang u Bah Damanbait Lamare, MLA ka Umroi Constituency, u Bah Charles Marngar, MLA ka Mawhati Constituency, u Dr. Celestine Lyngdoh MLA ka Umsning Constituency, u Deputy Commissioner u Abhilash Baranwal, C&RD Secretary u C.B. Sadhu, ka Dr. Kum Rimika Talang, BDO ka Bhoirymbong C&RD block nalor kiwei kiwei. Ia ka Bhoirymbong C&RD Block la tei ha ka jinglut kaba la kot kumba 4.5 crore ha ka jaka kaba don kumba 1,930 square meter.

Ia ka Umling C&RD Block ophis building la plie bad ai burom ia u Bah Rani Maring, u wei na ki kaitor ba paw ka them Ri Bhoi bad u ba ju shna ruh ia ki tiar put tiar tem tynrai, ha kane ka dei ka project ka la sahteng naduh u snem 1980 bad la lah ban pynurlong ia ka ban tei pyndep pura hadien 45 snem ha ka jinglut ba la mang kumba 5 crore tyngka ba la tei ha ka jaka kaba don kumba 2,050 square metre. La sakhi lang ha kane ka sngi, da ka jingiadonlang u Bah Sosthenes Sohtun, MLA ka Jirang Constituency nalor ki ophisar bad kiwei kiwei. Haba kren ha kane ka sngi, u Myntri Rangbah u la pyntip, ba kane ka thong jong ka sorkar jylla kaba thmu ban pyniajan ia ki bor district sha ki paidbah ba kin ioh ka jingshakri kaba biang, ha kaba tang ha kine ki 7 snem ba la leit noh ka sorkar jylla ka la mang haduh 2,500 crore ban pynbit pynbiang bad tei pynbha ia ki jingtei bapher bapher kum ki ophis sorkar, ki iingskul bad ki hospital ha kylleng ki jaka jong ka jylla. U la ong ruh, ba kine ki Block office watla bun kim phaikhmat hynrei ki dei ki ophis kiba kongsan bha ban pynttllun ia ki kam shakri paidbah khamtam ia ki skhim pynroi jong ka sorkar, da kaba bynrap ruh, ba kano kano ka jingiaid lynti kan sdang da kaba jam shikam arkam, hynrei lada ngim sdang ngin nym poi shano shano ruh, da kaba kdew ba kane ka sorkar ba mynta ka la lah ban pynurlong ia shibun ki kam pynroi kiba la pynsahteng da ki phew snem.

U Myntri Rangbah, u la pynpaw ruh ba ka sorkar ka la thaw lad da kaba plie da ka lad juk stad lane digital ban pynkylla ia ka rukom treikam ban pynsuk ia ki paidbah kiba donkam ia kino kino ki kot ki sla khlem da donkam shuh ban leit mih sha ka district headquarter ha kaba ki lah ban ioh tang na ki block office. “Ka Ri Bhoi District ka dei ka district kaba bha bok bha ban sakhi sa ia ki project pynroi ba kham heh kham heh ha ki por ban nang wan, ba kynthup naduh ka jingpynheh ka Shillong Airport ha Umroi bad ka jingtei ia ka Shillong – Guwahati Expressway ha ka jinglut kaban kot haduh 25,000 klur tyngka bad kiwei kiwei, kaban kyntiew ia ka ioh ka kot jong ki nongshong shnong khamtam ki khun samla”, ong u Myntri Rangbah. Na ka liang u Myntri ba dei khmieh ia ka Community & Rural Development u A.T. Mondal, u la iathuh ba kane ka tnad ka la pynlut haduh 180 klur tyngka ban tei ia ki ophis building jong ki 46 tylli ki block ha kylleng ka jylla, nalor kiwei kiwei ki kam pynroi kiban pynmyntoi ia u paidbah ka jylla hi baroh kawei.