Mynjur u Lat I’a Amendment Rule GHADC, ki bym dei riewlum kim ioh iakhun ilekshon MDC

U Myntri Rangbah ka Jylla u Conrad K Sangma hynne ka sngi, u la ai khublei ia u Lat ka Jylla u CH Vijayashankar halor ka jingmynjur ia ka jingpynkylla ia ka Amendment Rules kaba pynlong kongsan ia ki kyrtong ban don ka syrnot Schedule Tribe (ST) ban iakhun elekshon ha Garo Hills Autonomous District Council (GHADC).

U Conrad ula ai khublei ia u Lat ka Jylla lyngba ka rynsan Social Media X ka jong u ha kaba ula pynpaw, “Nga ai khublei ia u Lat ka Jylla halor ka jingmynjur ia ka Amendment jong ka Rule ba ki kyrtong ba ioh ban iakhun ilekshon GHADC ki dei ban don ka syrnot ST”.

Ka jingmynjur u Lat ia ka Amendment jong ka Assam & Meghalaya Autonomous District (Constitution of District Council) Rules ka la khanglad sbak ia ki briew bym dei ki riewlum ban iakhun ne thep vote ha ka ilekshon MDC ha GHADC.

Ka jingangnud ki paidbah ha rulum Garo ka la urlong hadien 74 snem naduh ba la thaw ia ki Autonomous District Council ha ka jylla Meghalaya ha u snem 1952.

Kumba long mynta ka GHADC ka shim ia ka sien jam kaba nyngkong ban khanglad iakhun ilekshon ia ki bym dei riewlum, kaba donkam mynta ia ka Khasi Hills Autonomous District Council (KHADC) bad Jaintia Hills Autonomous District Council (JHADC) ban pynkylla ia katei ka Rule ban khanglad iakhun ilekshon MDC ia ki bym dei riewlum.