Ki nongialam ka FKJGP South West Khasi Hills hynne ka sngi, ki la leit ai da ka dorkhas ia u Symbud Myntri Rangbah ka Jylla u Bah Prestone Tynsong ban kyrpad ban shna ia ki 3 tylli ki surok kiba kongsan ha ka District bad kane ka kynhun ka la pynpaw ia ka jingkmen haba ka la ioh ia ka jingkular na ka sorkar ban shna noh mardor ia kitei ki surok ban pynsuk ia ka leit ka wan jong ki paidbah. Ki nongialam ka FKJGP SWKH hapoh ka jingialam u President u Bah Keness Nonglait ryngkat ka jingdonlang ki nongialam jong ka FKJGP Sengkmie kila aiti ia ka dorkhas ha u Bah Prestone Tynsong ha kaba kila kyrpad ban shna ia ki 3 tylli ki surok kiba kongsan ka thain kiba kynthup ia ka surok na Weiloi shaduh Keniong, ban shna pynheh ia ka surok na Weiloi shaduh Ranikor bad ban shna ia ka surok Two Lane na Jingkieng Ranikor haduh Lad Alukoreng.
Haba iakren bad u Bah Keness Nonglait ula ong, ba ha ka 10 tarik u Nohprah 2024 u Myntri Rangbah ka jylla u Conrad K Sangma ula pynbna ban shna ia ka surok na Weiloi shaduh Keniong ha ka jinglut kaba long T.120 Klur bad kumta ka seng kala wan iakynduh ia u Bah Prestone Tynsong bad buddien halor katei ka jingpynbna jong u Myntri Rangbah. “U Bah Prestone Tynsong ula ai ka jingkular ia ngi ka seng, ba shen kin sa pynmih noh iaka ‘Order’ khnang ba ki Consultant kin ioh leit peit bad sorbe ia kane ka surok bad ban shna ia ka Detail Project Report (DPR) bad ngi sngewnguh ia u Myntri Rangbah bad ia u Symbud Myntri Rangbah kiba la shimkhia ia kane ka surok” la ong u Bah Keness Nonglait.Ula ong, ka seng kala dawa ruh ban shna pynheh noh iaka surok na Weiloi shaduh Ranikor bad halor kane ruh, na ka liang u Bah Prestone ula pynthikna ia ka seng, ba ka sorkar kan sa shna ha ka wat kaba nyngkong ia ka surok naduh na Weiloi shaduh Phlangwanbroi.
Ka FKJGP SWKH ka a dawa ruh ban shna noh ia ka surok na Jingkieng Ranikor shaduh Lad Alukoreng kaba don 4 Km sha ka Two Lane ban pynsuk ia ka leit ka wan jong ki paidbah namar lada jia ba don kano kano ka kali kaba sniew, kumta ki kali ki sahkut haduh 3 kynta.“Halor kane ka jingdawa, na ka liang u Bah Prestone Tynsong ula pyntip ia ngi, ba ula lum 3-4 sien ia ka jingialang bad ki kompani ban shna pynheh noh ia kane ka surok hadien ba la ioh ia ka jaka” ong u President ka FKJGP-SWKH bad ka kyntu ia ki paidbah ba lada ka sorkar ka sdang ia ka jingtrei ban shna pynheh ia ki surok kumta ki paidbah kidei ban ai ka jingiatreilang namar kan long ka jingmyntoi ia ki paidbah nongleit nongwan ba ia ka district hi baroh kawei.