Ai NoC ki SMC palat 3 hajar ki skul SSA ban pynïaid ka sorkar Jylla

Ki don haduh 3332 hajar tylli ki School Management Committee (SMC) jong ki skul SSA kiba don ha ka Jylla Meghalaya kiba la ai No Objection Certificate (NOC) lane ka jingmynjur ban aiti pynïaid noh ia la ki skul sha ka tnat Pule Puthi jong ka Sorkar Jylla.Ïa kane la pyntip da u President ka Meghalaya SSA School Association (MSSASA) u Bah Aristotle C Rymbai hadien ba wai ka jingïalang bad ka Commissioner Secretary ka tnat Pule Puthi u Vijay Mantri bad ki MSSASA, All Meghalaya Fourth Teachers Association bad ka All Meghalaya SSA School Teachers Association.

Haba kren shaki lad pathai khubor u Bah Aristotle ula ïathuh ba napdeng ki 3332 tylli SMC kiba la ai ka NOC, ki 298 tylli ki dei ki skul SSA kiba la pyniaid da ki NGO, ki Balang bad ki riewshimet katba 3034 tylli ki dei kiba pyniaid da ki shnong. Hapoh ka Jylla Meghalaya ki don 5131 tylli ki skul SSA kynthup ki UP bad LP School.U Bah Aristotle ula iathuh ruh ba haduh mynta kumba 65 percent ki bor pyniaid jong ki skul SSA kiba la mynjur ban aiti pynïaid noh iala ki skul sha ka tnat Pule Puthi ka Sorkar Jylla. Haduh mynta ki don sa 35 percent ki SMC ki bym pat shai, la kin aiti noh iala ki shnong shaka Sorkar ne kin iai bteng ban pynïaid hi.

U Bah Aristotle ula ïathuh ruh ba ka tnat Pule Puthi ka dang pynkhreh iaka Cabinet Memorandum ha kaba iadei bad ka jingshimti noh ka Sorkar iaki skul SSA bad ïa kane ka rai yn sa shim hadien ka Dorbar Synrai. U President ka MSSASA ula ïathuh ruh ba haka jingïalang bad u Commissioner Secretary, ka Association kala dawa ruh baka Sorkar kan pynthikna iaka tulop jong ki nonghikai SSA. “Ngi sngewkmen ban ioh sngew na u Commissioner Secretary ka tnat Pule Puthi ba ka Sorkar ka dang pynkhreh iaka song pisa ban siew tulop bad ïa kane ka mang tyngka yn sap hah shaka tnat Finance bad shaka kynhun Myntri Sorkar hadien ka Dorbar Synria” la ong u Bah Aristotle.