Aiti ka sorkar ia ka LoA sha ka kompani ban shna ia ka Ropeway ba T.175 klur ha Shillong Peak

U Myntri Rangbah ka jylla u Conrad K Sangma ryngkat u Myntri ka tnad jngohkai u Bah Paul Lyngdoh hynne ka sngi ki la aiti ia ka Letter of Acceptance (LOA) sha ka KEC International Limited–Tantia Construction Limited JV ban sdang ia ka Ropeway Project ha ka jinglut ba T.175 klur. U Myntri Rangbah hynne ka sngi ula ai ka pisa T.1.5 Klur ha ka wat ba ar sha u General Secretary ka Riat Laban Dorban Pyllun u Bah Glanding Lyngdoh, shibynta ka jingsiew bai jaka kaba long baroh T.3 Klur. Ha ka 16 tarik u Kyllalyngkot mynta u snem, ka President ka ri India ka Droupadi Murmu ka la buh ia u mawnongrim ban tei ia ka Shillong Ropeway Project, hynrei hynne ka sngi u Myntri Rangbah ula plie ia u maw nongrim ba la sdang ban tei ia ka Ropeway projek ha Shillong Peak, View Point. Haba kren ha ka jingialang u Myntri Rangbah ula iaroh ia baroh kiba don bynta ban pyndep ia ki jingdonkam ban sdang ia ka projek.

Ula ong, ki don bun ki jingeh naduh ka jingshim ia ka jaka, ka jingbit ban thaw ia ka Meghalaya Ropeway Development Authority ban pynthikna ia ka jingshngain bad ka jingai lisen. Ka jingsdang ia ka projek ka la seisoh hadien ba ka la don ka jingpynkhreh ba la shim por haduh 4 snem. U la pynpaw ka jingsngewnguh ia ka Raid Laban Dorbar Shnong Pyllun kaba la iatreilang bad ki shipai Air Force kiba la kyrshan ban sdang ia ka projek. Kane ka projek kan iaid lyngba ka Laban, Madan Laban, Upper Lumparing, Lower Lumparing, Lumkjatsngi, Oxford Hills bad Rngi Shillong.  Ula kyntu ia ki paidbah ban iatreilang bad ka sorkar bad kane ka projek kan iarap ban ioh lum khajna, kaba ai jingmyntoi ia ka Dorbar bad kiwei kiba ia don bynta.

U la pyntip ka sorkar ka dang thawlad ban pynïasoh bad kiwei ki jaka jngohkai bad pynduna ka jingkhap ngiah ha ka jaka hiar ka Ropeway ha Madan Laban bad ban shna da kawei ka lynti ba jrong kumba 4 km ban pyniasoh bad ka surok ha 101 Area, Upper Shillong da kaba pynpaw ba ka Ropeway ka dei ka lad ba biang ha ka leit ka wan ha ka jaka sor bad kan pynduna ia ka jingkhapngiah. Kum ban pynpaw ka dei ka sien nyngkong ha ka jylla ban don ka Ropeway ban kit ia ki nongleit nongwan ia kaba yn pyntrei da ka kompani na ka ri France ka POMA. Ha ka jingialang la donlang u Chairman ka Meghalaya Tourism Development Corporation u Bah Sanbor Shullai, u Chief Secretary u Bah DP Wahlang, u Commissioner & Secretary ka tnad Jngohkai u Dr. Vijay Kumar D, u Director ka tnad Jngohkai u Bah Cyril V.D. Diengdoh, ki nongialam shnong bad kiwei kiwei.