Angnud ka IORA ban iatreilang bad ki Nongrep ban pynneh ia ki khlaw ha Jylla

Shillong, Rymphang : Ka IORA Ecological Solution hynne ka sngi ka la pynpaw ka jingangnud ban bteng biang ka jingiatreilang bad ka Sorkar Jylla lem bad baroh 3 tylli ki District Council jong ka Jylla.

Ïa kane la pynpaw hi da u CEO ka IORA u Swapan Mehra hadien ka jingïalang bad u Caretaker ka KHADC u Bah Pyniaid Sing Syiem.

Haba kren sha ki lad pathai khubor u Swapan Mehra ula pyntip ba ki la ïatreilang bad ka Sorkar Meghalaya lem bad ki 3 tylli District Council kata ka KHADC, JHADC bad GHADC ban ai jingïarap ïa ki paidbah bad ki nongrep ha Meghalaya ban ïoh ïa ka dor ba bha tam lyngba ka Carbon Finance.

U Swapan u la pyntip ba ka Company IORA ka don ka jingiatreilang bad ka Bank jong ki nongrep kaba heh ha ka pyrthei kaba don ha Netherland, ka Rabo Bank ban kyntiew ia kane ka prokram ha ka Jylla.

U la ong ba ka jingthmu ka dei ban pynmih pisa ia ka Carbon ba nyngkong jong ki ha ki 2-3 bnai ban wan.

“Ka jaka ka la don lypa kumba 19 hajar hectare bad kumba 9000 ngut ki nongrep ha ka Digital Platform jong ki bad ka thong jong ki ka long ban rah ia kane sha ka 100 hajar hectare khnang ba ki nongrep ki lah ban kamai pisa lyngba ka Carbon Finance” la ong u Swapan.

U la iathuh mynta ka kynti, ka IORA ka iareilang bad kiwei ki nongbei tyngka bad ka Company na USA kata ka USDC bad kiwei ki Bank ba thrang ban bei tyngka ha Meghalaya.

Na ka liang u Caretaker ka KHADC u Bah Pyniaid Sing Syiem ula pyntip ba ka District Council ka la iatreilang bad ka IORA Ecological Solutions la shisnem mynta ban pyntreikam ia ka Agro Forestry Carbon Finance Project.

U Bah Pyniaid u la ong ba kane ka Company ka la ai jingiarap shibun ban pynsngewthuh bad ban ai ki jinghikai ia ki nongrep halor kumno ban pynneh ia ka mariang bad khamtam na ka bynta ki nongrep kin ioh ka jingmyntoi lyngba ka Payment for Ecosystem Services Scheme kaba la seng da ka Sorkar Jylla

U la ong ba ka KHADC ka thmu ban pyniar ia ka jingiatreilang bad ka tnat pla tyngka kaba don ha USA kata ka International Finance Development (IFD).

Lah ban kdew ba ka Payment for Ecosystem Services Scheme ka ai jingmyntoi lyngba ka jingkyrshan pisa kaba T.8 hajar shi hektar ha ka shisnem na ka bynta san snem.

Hapoh kane ka skhim, yn ai khusnam kaba T. 5,000 shi hectare ha ka shisnem sha kito ki khlaw ba la Register kum ki Community Reserves ha ka tnad khlaw bad T.2,000 shi hectare ha ka shisnem sha kito kiba don ka khlaw ba rben lane kiba la ithuh tynrai kum ki khlaw kyntang kane ki Sacred Grove.