Ar tylli ki takma rnong khur ka Senibi ha ka jingïakhun kti ha Uzbekistan

Ka samla Senibi Syngkli kaba na Ri Bhoi District, ka la lah ban wanrah ia ka nam ka burom ymtang ia ka ri India hynrei wat ia ka jylla Meghalaya hadien ka jingioh ban khur ar tylli ki takma rnong ha ka lympung ialehkai World Armwrestling & Para Armwrestling Cup 2026 kaba la long ha Tashkent, Uzbekistan naduh ka 31 tarik Kyllalyngkot haduh 7 tarik Rymphang 2026.
Lah ban kdew ruh, ba ka samla Senibi Syngkli ka la shah jied ruh kum ka Captain na bynta ban ialam khmat ia ka kynhun ki thei iakhun kti
(Armwrestling) sha katei ka lympung ialehkai iakhun kti kaba la long ha ka Uzbekistan.
Nalor ki ar tylli ki takma rnong ba la ioh khur ha ka 60 kg Senior Women (Both Left and Right) ka samla Senibi Syngkli ka la khur ia ka nam kum ka “Female Player of the Year”, kaba la ithuh da ka Pro Panja League (PPL), ka lympung ïakhun kti kaba heh tam ha Ri India, kaba khring ïa ki nongïakhun kti ba kynsai na kylleng ka ri.
Hadien ka jingwanphai na Uzbekistan, la pdiang burom ia ka Samla Senibi Syngkli, da ki nongialam ka Ri Bhoi Women Organization ba la lamkhmat da ka Kong Mery June Syngkli kum ka President lem bad ki dkhot nalor ki nongialam ka HNYF, Sport Cell jong ka Northern Region ha ka jingiadonlang u samla Birbor Khongbeh, Sports Secretary, u Samla Ronald Tangsang, Assistant Discipline Secretary, u Bah Donroi Kshiar, Education Secretary, lem bad kiwei pat ki dkhot jong kitei ki ar seng.
Haba kren bad ki Nongthoh Khubor, ka samla Senibi Syngkli, ka la pynpaw ia ka jingkmen kaba khraw ban lah ban aireng ha katei ka lympung iakhun kti kaba heh ban aireng bad ki nongiakhun kti kiba na kylleng ki ri bad da ka jingtreishitom bad len lade da kaba pyndonkam hok ia ki lad jinghikai ba ka la ioh na ka jingleit kilan met sha Mizoram ka la lah ban ioh khur ia ki ar tylli ki takma rnong.
Ka la iathuh ruh, ba watla ka la mad Shibun ki jingeh khamtam ha kaba ia dei bad ka jinglut jingsep namar ka jingkhim jong ka por ban leit shimbynta sha Uzbekistan, hynrei kam shem la kynrandien bad treishitom ban lah ban wanrah ia ka nam ka burom ia ka ri India bad ia ka jylla Meghalaya bad kane ka jingjop jong ka ban khur ia ki takma rnong ha katei ka lympung ka kyrmen skhem ba kan ai mynsiem ia kiwei de ki para kynthei kiba ieid ia ka kam ialehkai sport jong ka Armwrestling.