Ba khot ïakren u MR, sangeh iakhih ki nongtrei Muster Roll

Ki nongtrei Muster Roll hapoh ka Jylla hynne ka sngi ki la pynbna ban weng shwa ia ki program iakhih hadien ba u Myntri Rangbah ka Jylla ula kular ban khot iakren halor ki mat jingdawa jong ki. Ia kane la pynbna da u General Secretary ka Joint Action Committee Muster Roll Worker Union (JACMRWU) Bah Bympherlang Pyndem. Haba pynbna ia kane ka rai, u Bah Bympherlang ula iathuh ha ka jingshisha ki nongtrei Muster Roll ki la rai ban iakhih naduh ka 17 tarik Nohprah, namar ka Sorkar kam shym la ai jingthoh ba ym lah ban pyntreikam ia ka Floor Rate, VDA bad ka rta shongthait nalor kiwei ki mat jingdawa.

U Bah Bympherlang ula ong, ba ki Nongtrei Muster Roll ki la ioh jingtip na u Adviser u Bah Khroo Pariat hadien ba ula ioh ban kren markhmat bad u Myntri Rangbah ka Jylla u Conrad K Sangma.”Ha ka jingiakynduh ia u Myntri Rangbah, ula kular ha u Adviser jong ngi ba un khot iakren ia ki nongtrei Muster Roll ha ka 17 tarik Nohprah lane ha ka taiew banyngkong u bnai Kyllalyngkot 2026″ la ong u Bah Bympherlang.

“Kumta ngi sngew dei ban burom ia ka jingkular u Myntri Rangbah bad ngin ap haduh da ioh iakren bad lada ka jingiakren kam long kaba sei soh, ngin sa shim pat ia ka rai” u la ong. U Bah Bympherlang ula kyntu ia u Myntri Rangbah ka Jylla ban bthah ia ka tnat Animal Husbandry ka Sorkar Jylla ban pyllait ia ka tulop jong ki nongtrei Muster Roll ba dangsah hynriew bnai.