Ba pynïasoh Congress palat spah ngut ki nongialam bad nongkyrshan na kiwei ki party

Katba ka ilekshon sha Iingdorbar Thawain ka Khasi Hills Autonomous District Council (KHADC) ka la nang jan, ka Congress party ha Mawkyrwat ruh ka la nang ioh bor shuh shuh hadien ba palat spah ngut ki nongialam bad ki nongtrei ka party na kiwei pat ki seng sain pyrthei kiba kynthup ia ka TMC, NPP bad UDP ki la wan ban pyniasoh ia lade bad kane ka party. Ïa kine kiba wan pyniasoh thymmai la pdiang burom sha ka party da u President ka South West Khasi Hills District Congress Committee (SWKHDCC), u bah Kynpham V. Kharlyngdoh bad u kyrtong MDC ka Congress, u bah Medal Sing Lyngdoh uba ju khot ieit Bah Pep, ha ka jingïadonlang kiwei pat ki nongïalam ka party napoh na Mawkyrwat Block Congress Committee (MBCC). bad ka Ranikor Block Congress Committee (RBCC) ha kaba jingialang kaba la long mynta ka sngi ha Mawkyrwat.

Kiba bun napdeng kine kiba wan ïasoh thymmai kidei ki nongïalam bad ki nongtrei ka party jong ka THC Mawkyrwat ha kaba la ialam da u Vice President, u Bah Daros Ramsiej bad Chief Organiser, Kong Prilim Marwein lem bad kiwei de ki nongialam TMC Mawkyrwat. La don ruh katto katne ngut ki nongkyrshan ka UDP bad NPP kiba la wan pyniasoh sha ka Congress. Haba kren ha kane ka jingïalang, u President ka DCC, u bah Kynpham V. Kharlyngdoh u la ong, “Ha kine ki khyndiat bnai ba la dep nga don ka jingartatien ban jop ïa kane ka elekshon hadien ba u MDC jong ngi u bah Carness Sohshang bad kiba bun ki nongïalam ki la mih noh na ka party bad pynïasoh sha ka NPP. Hynrei da ka jingwan pyniasoh u Medal Sing Lyngdoh (u kyrtong ka HSPDP ha ka elekshon sha ka iing dorbar thawain ba la dep) bad ki nongkyrshan jong u bad mynta ka kynhun TMC, nga ngeit skhem ba ngin jop ha kane ka elekshon MDC napoh Mawkyrwat Constituency”.

U bah Kynpham u la ong ba haduh mynta um pat sngewthuh balei ba u MDC ba mynta, bah Carness Sohshang u la mih noh na ka party bad rung sha ka NPP, lehse namar ba kadei ka party kaba synshar. “Hynrei, nga kyrpad ia ki paitbah ba kidei ruh ban pyrkhat arsien balei u bah Medal Sing Lyngdoh na ka HSPDP kaba don ha ka liang synshar, u wan pyniasoh sha ka Congress kaba don ha ka Liang Pyrshah. Ngan ïathuh ïa phi ïa kane, u bah Medal Sing u kwah ban jop elekshon bad dei na kata ka daw ba u rung sha ka Congress namar u tip ba ka Congress ka don ïa ka ktem kaba khlaiñ bha ha Mawkyrwat bad khlem artatien kan sa jop biang mynta ka kynti,” ong u bah Kynpham. Katba u kyrtong ka Congress, u bah Medal Sing Lyngdoh u la kyntu ia ki nongialam bad ki nongtrei ka party ba kin trei shitom da kaba iakynduh ia baroh ki nongkyrshan ha la ki shnong ki thaw namar dei tang u Bah Carness Sohshang bad ki nongialam kiba la mih na ka party, hynrei ki nongkyrshan ki dang sah haduh mynta.