Ban ïa kam leit bri, dang im ka kam ïalam jngohkai ïa ki Tourist : bah Tirot

Ka jingtuid ki nongwankai nabar ban leit peit bad iuhkjat sha shnong Nongriat ban iohi ia ka jingkieng jri ar mala ne double decker, ka la ai jingmyntoi shibun ia ki briew ka thain bad ki shnong ba marjan ka Nongriat. Ban poi sha Nongriat, ka don ar tylli ka lynti ban iaid, bad kawei ka dei na shnong Tyrna naphang mihngi, kaba kham iaid paidbah bad kham suk bad kawei pat ka dei na shnong Mawlakhiat, kaba hap long noh bad thiep bha. Ha ka jingiakren bad uwei u nongialam lynti ia ki nongwankai ne tourist guide na ka thain Mawlakhiat, shaphang kumno ki sngew bad haduh katno ki sngew ba ka la wanrah jingmyntoi shisha ka kam jngohkai pyrthei.

U bah Tirot Wansai uba ju ialam lynti ia ki nongwankai na thain Wahlakhiat, ula pynpaw ba ka kam ka long kaba sngew tynnad bad ka ai jingmyntoi shisha ban pyndap ha iing ha sem. Watla u la kham iaw hynrei ka bor ki nongkyndong ka khlain bad ka eh bha namar ba ki im bad ka mariang bad um ju thait ban wan shaw bad ban leit on ia ki nongwankai lada shah wat ar sien ne lai sien ha ka shi sngi ruh. U bah Tirot ula sdang ia kane ka kam ban ialam ia ki nongwankai naduh u snem 2018 haduh mynta. Katkum ka jingiathuh u bah Tirot, ula kham sngew im na ka kam ialam nongwankai ban ia kiwei ki kam khamtam ban leit bri sha khlaw sha btap, katba kane ka kam, ka kham suk namar ba la shu ialam beit ha lynti ia ki nongwankai bad sngew tynnad ban iakynduh ia ki nongwankai ban iakren iakhana ruh bad ka shai ka jingmut jingpyrkhat ruh.

Ha kajuh ka por, u sngew kyndit thret hadien ba la mih ka jingjia ha kaba ar ngut ki nongwankai, kata u Raja Raghuvanshi bad ka Sonam Raghuvanshi kila jah rngai bad kham hadien pat, la lap ba u Raja ula shah pyniap katba ka Sonam ka la shah kem namar ka jingkynnoh donkti nalor kiwei pat.