Ban iada ia ki trai muluk Meghalaya

Ka Confederation of Meghalaya Social Organisations (CoMSO) hynne ka sngi ka la dawa na ka Sorkar Jylla ban pyntreikam ia ka Special Institutional Reform (SIR) bad wanrah jingpynkylla (Amendment) ia ka Scheduled Tribe (ST) order 1950.

Ia kane ka rai ka CoMSO ka la shim ha ka jingialang ha nongbah Shillong ha ka jingdonlang kiwei ki nongialam sengbhalang kiba don hapoh ka CoMSO.

Haba kren sha ki lad pathai khubor u Chairman ka CoMSO, u Bah Roykupar Synrem ula ong, dang shen ka seng ka la dep phah dorkhas sha ka Home Ministry ka Sorkar Pdeng bad sha ka Election Commission of India (ECI) ban dawa ba dei ban pyntreikam noh ia ka SIR ha Meghalaya baroh kawei.

U Bah Roy ula pynshai ka jingthmu jong kane ka SIR ka long ban pynkhuid ne pynbeit ia ka thup nongthep vote (Electoral Roll) namar ba ka Jylla Meghalaya ka la sakhi ka jingjur ka jingwan buhai shnong beain ki bar Jylla.

Ula kynnoh bun ki briew ba wan na bar jylla ki ioh rung ha ka thup kyrteng nongthep vote (Electoral Roll) bad kane ka long ka jingma ia ki trai ri trai muluk kiba dei trai shnong ha ka lawei ban wan.

U Chairman u la pynpaw bun ki nongshong shnong ha ki thain khappud bad ka Assam ki don 2 tylli ki EPIC Card (Dual Voter) ki ioh ban thep vote ha Meghalaya bad ha Assam, kumta lada pyntreikam ia ka SIR, ki mynder ba ioh rung beain kin nym ioh ia ki hok hapoh ka sainpyrthei kumba ioh ki trai shnong.

“Ngim lah ban kyntait ia ka jingshisha ba ki don ki mynder ha Meghalaya bad kine ki nongwan rung tuh beain ym tang ba ki kyntur lane buhai ha ki jaka ba dei jong ki trai muluk hynrei bun na ki, ki ioh lad ruh ban thep vote ban jied ia ki nongmihkhmat ” la ong u Bah Roy.

Ka CoMSO ka dawa ruh ia Sorkar Jylla ban pynkylla noh ia ka ST Order 1950, kaba kdew haduh mynta ki don kumba 53 ne 54 tylli ki jaitbynriew kiba ioh ia ka bhah Scheduled Tribe (ST) ha jylla Meghalaya, kata katkum ka Order ba la pynmih naduh ka por ba ka Meghalaya ka dang don bad ka Assam.

“Namar kane ka pynlong ia kiwei ki jaitbynriew riewlum na kiwei ki jylla ban ioh ban thied jaka, ban leh ki kam khaii bad wat ban iakhun election ha Meghalaya, ki Khasi, Jaintia, bad Garo pat kim ioh kum kine ki hok ha ki jylla kum ha jylla Manipur ne ha Assam” ula ong.

U Bah Roykupar ula ong, shwa ka CoMSO kan leit sha ki paidbah ban pynshai halor kane ka mat kan iakynduh ia ki nongialam seng sain pyrthei, ki khlieh nongsynshar bad ki kynhun bapher bapher ban ia syllok halor kane ka mat bad ban por ia ka sorkar jylla ban iakren bad ka Sorkar Pdeng.

“Ngin sa ai jing thoh sha ka Sorkar Jylla ha kane ka taiew bad ka dei ban shimkhia ia kane ka kam. Ngin ai por ia ka Sorkar ba hapoh katta katta ka por, namar kine ki mat ki dei ruh ban iakren bad ka Sorkar Pdeng, ka ECI bad kiwei ki bor ba dei peit ia ka hok ki jaidbynriew riewlum rit paid katkum ka Sixth Scduled ka rit synshar ka Ri” ula ong.

“Ngin sa ai da ka jingthoh ia baroh ki seng sain pyrthei ha ka Jylla bad lyngba jong ki, kin sa iakren bad la ki jong ki MLA/MDC , namar ngim lah ban iakynduh ia baroh 60 ngut ki MLA, hynrei ngin iakynduh tang ia ki President bad Secretary jong ki party” ula bynrap.