Ban thung Vice Chancellor ha NEHU Ka sorkar pdeng ka dei ban ïasyllok bad ka sorkar Jylla

Ka Myntri Sorkar ka Kong Ampareen Lyngdoh ka la ong ba ka Sorkar Pdeng ka dei ban shimkhia ia ka jinglong jingman bad ka jingïakhih kaba dang iaid haduh mynta ha North Eastern Hills University (NEHU). Haba kren sha ki lad pathai khubor ka Kong Ampareen kala kyntu iaka Inquiry Committee bala thung daka Ministry of Education ka Sorkar Pdeng ban ai jingmut kaba skhem kaba shimkhia ia baroh ki jingai jingmut jong ki kynhun ba iakhih hapoh NEHU khamtam naka liang ki samla pule. Lah ban kdew ba ha ka 24 tarik Naiwieng, ki dkhot ka Inquiry Committee ba lamkhmat da u Chairman barim ka UGC u Prof DP Singh bad u Vice Chancellor barim ka Assam University u Prof Dilip Chandra Nath ki la pynlong ïa ki jingïalang hapoh NEHU.

“Nga kyrmen ba kane ka komiti tohkit kaba la wan kan leit phai biang da ka jingai jingmut kaba skhem ban shimkhia ia baroh ki jingaai jingmut daki samla pule, ki nonghikai bad ki nongtrei ka NEHU” la ong ka Kong Ampareen. Haba pynpaw ia ka jingsngewkhia halor ka jingpynsangeh ia ki klas ha NEHU, ka Kong Ampareen ka la ong “Ka long kaba kongsan ia ka. Sorkar Pdeng ban don beit ka jingiamir jingmut kaba jan bad ka Sorkar Jylla halor ki mat jong ka jingthung kam khamtam ia u vice chancellor”.

“Lada phi iamir jingmut bad ka Sorkar Jylla bad shim ia ki jingai jingmut jong ka bad lada phi kynthup ia ka jylla ha ki kam jied VC, phin ioh ki briew kiba biang namar ka jylla Meghalaya kaba pher bha bad kaba kyrpang na kiwei pat ki jylla. Te kum kane ka jingïakynad, jingiapher jingmut kin nym mih hapoh ka skulbah” kala ong. Ka Myntri Sorkar ka pynpaw ka jingngeit skhem ba ïa kane ka jingeh yn sa pynbeit, khnang ba ki khynnah skul kin leit phai biang sha la ki jong ki jong ki klas.